पुणे : माहेरहून पैसे आणण्यासाठी, सदनिका सासूच्या नावावर करण्यासाठी आणि घटस्फोटाच्या वादातून होणाऱ्या कथित शारीरिक व मानसिक छळाला कंटाळून आयटी अभियंता विवाहितेने आत्महत्या केल्याची घटना केशवनगर येथे घडली. त्रिष्णा राहुल सकपाळ (वय ३३, रा. केशवनगर, मुंढवा) असे मृत विवाहितेचे नाव आहे. या प्रकरणी मुंढवा पोलिसांनी पतीसह सासरच्या पाच जणांविरुद्ध गुन्हा दाखल केला आहे.
त्रिष्णाचे वडील बाळकृष्ण निकम (वय ७४, रा. केशवनगर) यांनी याप्रकरणी पोलिसांत फिर्याद दिली आहे. त्यानुसार पती राहुल संजय सकपाळ, सासू वैशाली संजय सकपाळ, सासरे संजय मनोहर सकपाळ, नणंद शैली संजय सकपाळ आणि आजेसासू शकुंतला साळुंके यांच्याविरुद्ध गुन्हा दाखल करण्यात आला आहे. हे सर्वजण हडपसर येथील डिफेन्स कॉलनी परिसरात राहतात.
पोलिसांनी दिलेल्या माहितीनुसार, त्रिष्णाचा विवाह २०१८ मध्ये राहुल सकपाळ याच्याशी झाला होता. लग्नावेळी माहेरच्या मंडळींनी १३ तोळे सोन्याचे दागिने दिले होते. त्रिष्णा एका आयटी कंपनीत नोकरी करत होती. तिचा संपूर्ण पगार सासरच्या मंडळींना द्यावा, तसेच माहेरची सदनिका सासूच्या नावावर करावी, यासाठी तिचा छळ केला जात असल्याचा आरोप फिर्यादीत करण्यात आला आहे. सासऱ्यांनी तिच्या नावावर एक कोटी रुपयांची सदनिका घेऊन देण्याचा आग्रह धरल्याचाही आरोप आहे.
वारंवार होणाऱ्या कथित मारहाण आणि छळामुळे त्रिष्णा व तिचा पती २०२१ मध्ये केशवनगर येथे स्वतंत्र राहू लागले. मात्र, तिथेही पतीने मारहाण करून घराबाहेर काढल्याने ती माहेरी राहायला गेली होती. त्यानंतर पतीने घटस्फोटासाठी न्यायालयात दावा दाखल केला होता.
दरम्यान, २९ सप्टेंबर रोजी सकाळी साडेअकराच्या सुमारास त्रिष्णाने राहत्या घरी गळफास घेऊन आत्महत्या केली. आत्महत्येपूर्वी तिने चिठ्ठी लिहून ठेवल्याचे समोर आले आहे. पती, सासू, सासरे, नणंद आणि आजेसासू यांच्या त्रासाला कंटाळून हे पाऊल उचलत असून, तेच आपल्या मृत्यूला जबाबदार असल्याचा उल्लेख चिठ्ठीत असल्याचे सांगितले जात आहे. या प्रकरणी मुंढवा पोलीस पुढील तपास करत आहेत.
