पुणे: पुण्यातील आळंदी-मरकळ रस्त्यावर असलेल्या एका खासगी रिसॉर्टमध्ये आयोजित करण्यात आलेल्या हायप्रोफाईल पार्टीवर पुणे पोलिसांच्या गुन्हे शाखेने मध्यरात्री छापा टाकत मोठी कारवाई केली. या कारवाईत अमली पदार्थांचा छोटा साठा, विनापरवाना हुक्का आणि लाखो रुपयांची दारू जप्त करण्यात (Pune Project X Party) आली आहे. पार्टीत सुमारे 60 ते 70 तरुण-तरुणी सहभागी झाल्याचे समोर आले असून त्यांची चौकशी सुरू आहे. (Pune Crime)
पोलिसांना या रिसॉर्टमध्ये मोठ्या प्रमाणावर पार्टी आयोजित केल्याची गुप्त माहिती मिळाली होती. त्यानुसार सुमारे 80 पोलिसांचे पथक घटनास्थळी दाखल झाले. पोलिसांची उपस्थिती पाहून पार्टीतील अनेकांमध्ये गोंधळाचे वातावरण निर्माण झाले. या कार्यक्रमाचे आयोजन “प्रोजेक्ट एक्स” या नावाने करण्यात आले होते.
कारवाईदरम्यान पोलिसांनी सुमारे 3 ग्रॅम गांजा, परवानगी नसलेला हुक्का आणि अंदाजे 9.22 लाख रुपयांची दारू जप्त केली. जप्त केलेल्या मद्यामध्ये अनेक विदेशी ब्रँडचाही समावेश असल्याचे सांगितले जात आहे. पोलिसांनी एकूण सुमारे 85 लाख रुपयांचा मुद्देमाल ताब्यात घेतला आहे.
तपासात आयमन शेख आणि यश चौधरी यांनी या पार्टीचे आयोजन केल्याचे समोर आले असून दोघांना पोलिसांनी ताब्यात घेतले आहे. पोलिसांच्या माहितीनुसार, त्यांनी आठ दिवसांपूर्वी सोशल मीडियावर “प्रोजेक्ट एक्स” हाऊस पार्टीचे पोस्टर प्रसारित केले होते आणि काही प्रचारात्मक व्हिडिओही शेअर केले होते. या माध्यमातून तरुण-तरुणींना पार्टीसाठी आमंत्रित करण्यात आले होते.
सध्या फॉरेन्सिक पथक घटनास्थळी तपास करत असून पार्टीमध्ये अमली पदार्थांचा वापर झाला का आणि उपस्थितांनी त्याचे सेवन केले का, याचा तपास सुरू आहे. पार्टीत सहभागी झालेल्या सर्वांची वैद्यकीय तपासणी करण्यात येणार असल्याचे पोलिसांनी सांगितले. तपास पूर्ण झाल्यानंतर या प्रकरणात आणखी माहिती समोर येण्याची शक्यता आहे.
