बुलढाणा: बुलढाणा येथे भीषण अपघात झाला असून, त्यात पाच जणांचा जागीच मृत्यू झाला आहे. या अपघातात एसटी बस, बोलेरो, खासगी ट्रॅव्हल्स बस यांच्यात जोरदार धडक झाल्याने हा भीषण अपघात झाला आहे. धडक इतकी जोरदार होती कि, वाहनांचे मोठे नुकसान झाले आहे. पहाटे साडेपाचच्या सुमारास खामगाव-शेगाव रस्त्यावर जयपूर लांडे फाटा येथील ब्रह्मांडनायक हॉटेलजवळ हा भीषण अपघात झाला. प्रत्यक्षदर्शींनी दिलेल्या माहितीनुसार, पुण्याहून परतवाड्याला जाणाऱ्या एसटी बसला विरुद्ध दिशेने येणाऱ्या भरधाव बोलेरोने धडक दिली. त्यानंतर लगेचच खासगी ट्रॅव्हल्स बसने बोलेरोला धडक दिल्याने अधिक नुकसान झाले.

दुर्दैवाने, या अपघातात 24 जण जखमी झाले, त्यापैकी सहा जण गंभीर जखमी झाले असून त्यांना बुलढाणा येथील उपचार केंद्रात हलवण्यात आले आहे. अपघाताची माहिती मिळताच पोलिसांनी घटनास्थळी धाव घेत जखमींना खामगाव येथील शासकीय रुग्णालयात हलविले. या घटनेचा पुढील तपास पोलीस करत आहेत.







