लोणी काळभोर (पुणे) : लोणी काळभोर येथील सृष्टी विजय जाधव हिने बॉक्सिंग (मुष्टियुद्ध) या पुणे शालेय विभागीय स्पर्धेमध्ये सुवर्णपदक पटकावले. अकोला येथे होणाऱ्या राज्यस्तरीय बॉक्सिंग स्पर्धेसाठी तिची निवड झाली आहे. १७ वर्षांखालील ४२ किलो वजनी गटात हे सुवर्णपदक पटकाविले आहे.
अहमदनगर याठिकाणी स्पर्धेचे आयोजन करण्यात आले होते. या स्पर्धेसाठी महाराष्ट्रातून सोलापूर, नाशिक, पुणे, पिंपरी-चिंचवड, अहमदनगर आदी जिल्ह्यांतील विद्यार्थ्यांनी सहभाग नोंदवला होता. सृष्टी ही हडपसर येथील साधना इंग्लिश मिडीयम स्कूलमध्ये शिकत आहे.
या स्पर्धेत तिला बॉक्सिंग कोच आद्य क्रांतिगुरू लहुजी वस्ताद साळवे क्लब, पुणे येथील विजय गुजर, राम जगताप, विशाल गव्हाणे, सातारा बॉक्सिंग अकॅडमीचे सागर जगताप तसेच साधना इंग्लिश मीडियम स्कूल, हडपसरच्या प्राचार्या रोहिणी सुशीर, वर्गशिक्षक अंजना भंडारी व क्रीडा प्रशिक्षक अभिषेक जाधव यांचे मार्गदर्शन लाभले.
दरम्यान, सृष्टी ही लोणी काळभोर पोलीस ठाण्यातील पोलीस हवालदार विजय जाधव यांची कन्या आहे.
