गुवाहाटी: आयपीएल 2026 च्या 19 व्या मोसमातील (RR vs MI) 13 व्या सामन्याची चर्चा क्रिकेट जगतात वर्षानुवर्षे होईल. पावसाच्या व्यत्ययामुळे 11-11 ओव्हरच्या करण्यात आलेल्या या ‘हाय-व्होल्टेज’ सामन्यात राजस्थान रॉयल्सच्या अवघ्या 15 वर्षीय वैभव सूर्यवंशीने जागतिक क्रिकेटचा ‘किंग’ मानल्या जाणाऱ्या जसप्रीत बुमराहचे स्वागत पहिल्याच चेंडूवर खणखणीत षटकाराने केले. कोवळ्या वयातील मुलाने दाखवलेली ही जिद्द राजस्थानच्या विजयाचा पाया ठरली.
बरसापारा स्टेडियमवर पावसाने खेळ थांबवला होता, पण खेळ सुरू होताच मैदानावर जैस्वाल आणि सूर्यवंशी नावाचे वादळ आले. डावातील दुसरे षटक टाकण्यासाठी जेव्हा मुंबई इंडियन्सचा हुकमी एक्का जसप्रीत बुमराह आला, तेव्हा सर्वांना वाटले की, तो नवख्या वैभवला आउट करेल. मात्र, वैभवने बुमराहच्या पहिल्याच चेंडूवर 88 मीटर लांब षटकार ठोकून सर्वांच्या भुवया उंचावल्या. बुमराहसारख्या भेदक गोलंदाज असतांना पहिल्या ओव्हरमध्ये 14 धावा केल्या.
पाहा व्हिडीओ:
The sheer audacity of Vaibhav Sooryavanshi 🫡
🎥 The 1️⃣5️⃣ year old welcomes Jasprit Bumrah with a maximum! 👏#TATAIPL | #KhelBindaas | #RRvMI | @rajasthanroyals pic.twitter.com/cI0zqCXz0X
— IndianPremierLeague (@IPL) April 7, 2026
वैभवने केवळ 14 चेंडूत 39 धावांची झंझावाती खेळी केली, ज्यामध्ये 5 षटकारांचा समावेश होता. त्याचा स्ट्राईक रेट 279 च्या आसपास होता. दुसऱ्या बाजूला यशस्वी जैस्वालनेही (32 चेंडूत नाबाद 77) आक्रमक पवित्रा घेतल्याने राजस्थानने 11 ओव्हरमध्ये 150 धावांचा डोंगर उभा केला. 151 धावांच्या आव्हानाचा पाठलाग करताना मुंबईची फलंदाजी पत्त्यासारखी कोसळली. जोफ्रा आर्चर आणि नांद्रे बर्गर यांच्या अचूक माऱ्यामुळे रोहित शर्मा, सूर्यकुमार यादव आणि हार्दिक पांड्या स्वस्तात माघारी परतले. मुंबईला 9 बाद 123 धावांपर्यंतच मजल मारता आली आणि राजस्थानने 27 धावांनी दिमाखदार विजय मिळवला.
