पुणे : पुण्यातील केतन अग्रवाल प्रकरणात दाखल करण्यात आलेल्या चार्जशीटमधून या प्रकरणातील तपासासंदर्भात धक्कादायक माहिती समोर आली आहेया हत्येचा कट रचताना आरोपींनी सोशल मीडियासह गुगलचा मोठ्या प्रमाणावर वापर केल्याचे तपासातून उघड झाले आहे.
मिळालेल्या माहितीनुसार, या संपूर्ण कटाचा मुख्य सूत्रधार रितेश हांगे असल्याचे पोलिसांचे म्हणणे आहे. लोहगडावरून केतनला खाली दरीत ढकलून अपघाताचा आभास निर्माण करण्याचे आरोपींनी ठरवले होते. यासाठी सांगवी येथील मानसी गोविंदपुरकर यांच्या लोहगडावरील प्रकरणाची माहिती त्यांनी फेसबुकवरून मिळवली. लोहगडाची रेकी करण्यासाठी 29 मे रोजी आरोपी गेले होते. त्यानंतर 31 मे रोजी सिया गोयलने केतनला तिथे नेऊन घटनास्थळाचे छायाचित्रे काढले आणि ते चेतन चौधरीला दाखवले.
केतनला दरीत कसे ढकलायचे, याचा सराव आरोपींनी लुल्लानगर भागात आधीच केला होता. योजनेनुसार चेतन चौधरीने केतनला मागून धक्का दिला, तर सिया गोयलने पायावर लाथ मारून त्याला खोल दरीत पाडले. हा भयानक प्रकार काहींनी प्रत्यक्ष पाहिल्याचा उल्लेखही चार्जशीटमध्ये करण्यात आला आहे. एवढेच नव्हे तर हत्येनंतर पोलिस किंवा घटनास्थळावरील लोकांशी कसा संवाद साधायचा, याचे पूर्ण नियोजन आधीच तयार करण्यात आले होते.
गुन्हेगारांनी गुगलवर विविध विषयांवर शोध घेतला होता. यामध्ये ‘सोनम केस’, ‘Death Cap Mushroom India’, आयफोनमधील कॉल हिस्ट्री कशी मिटवायची, तसेच लोहगड परिसर आणि ट्रेकिंग दरम्यान होणारे अपघात यांसारख्या बाबींचा समावेश होता. या सर्व शोधांचा या कटाशी थेट काय संबंध होता, याचा सखोल तपास पोलिसांनी पूर्ण केला आहे.
