बीड : बीड जिल्हा कारागृह गेल्या काही काळापासून विविध गैरप्रकारांमुळे आणि सुरक्षेतील त्रुटींमुळे सातत्याने वादाच्या भोवऱ्यात सापडले आहे. याच पार्श्वभूमीवर आता एक मोठी घडामोडी समोर आली असून कारागृहातील दोन कर्मचाऱ्यांवर निलंबनाची धडक कारवाई करण्यात आली आहे.सरपंच संतोष देशमुख हत्या आणि खंडणी प्रकरणातील मोक्काअंतर्गत आरोपी वाल्मिक कराड आणि त्याची टोळी सध्या याच कारागृहात आहे.
मिळालेल्या माहितीनुसार, संबंधित कर्मचाऱ्यांनी कर्तव्यात दाखवलेला निष्काळजीपणा, नेमून दिलेल्या ठिकाणी उपस्थित न राहणे आणि कामकाजातील अनियमितता या गंभीर कारणांमुळे वरिष्ठ पातळीवरून त्यांच्यावर ही कारवाई करण्यात आली आहे. याशिवाय काही इतर कर्मचाऱ्यांनाही ‘कारणे दाखवा’ नोटिसा बजावण्यात आल्याने प्रशासनात मोठी खळबळ उडाली आहे.
कारागृहात विशिष्ट कैद्यांना व्हीआयपी सुविधा, व्हिडिओ कॉन्फरन्सिंग आणि फोन कॉलची अनधिकृत सूट दिली जात असल्याचा आरोप संतोष यांचे बंधु धनंजय देशमुख यांनी केला होता. त्यांनी याप्रकरणी कारागृह महानिरीक्षकांकडे लेखी तक्रार दाखल केली होती. या तक्रारीनंतर उच्चस्तरीय पथकाने कारागृहाची अचानक पाहणी करून गोपनीय अहवाल सादर केला. याच अहवालाच्या आधारे ही निलंबनाची कारवाई करण्यात आली आहे.
दुसऱ्या बाजूला, या कारवाईबाबत जिल्हा कारागृह अधीक्षक रामराजे चांदणे यांच्याशी संपर्क साधला असता, वरिष्ठांकडून अद्याप कोणतेही अधिकृत आदेश प्राप्त झाले नसल्याचे सांगत माहिती घेऊन स्पष्टता देईन, असे त्यांनी नमूद केले.
सध्या हे वर्ग 2 श्रेणीचे कारागृह केवळ गैरप्रकारांमुळेच नव्हे, तर क्षमतेपेक्षा जास्त असलेल्या कैद्यांच्या संख्येमुळेही चर्चेत आहे. या कारागृहाची मूळ क्षमता केवळ 160 कैद्यांची आहे; मात्र प्रत्यक्षात येथे तब्बल 390 कैदी ठेवण्यात आले आहेत. क्षमतेपेक्षा दुप्पट कैदी असल्याने कारागृहात प्रचंड गर्दी झाली असून कैद्यांचे व्यवस्थापन करणे प्रशासनासाठी मोठे आव्हान ठरत आहे.
