बीड : बीड जिल्ह्यातील गेवराई शहरात कौटुंबिक वादातून सावत्र मुलाने वडिलांवर गावठी कट्ट्यातून गोळीबार केल्याची धक्कादायक घटना घडली. गेवराई शहरातील संजयनगर परिसरात सोमवारी रात्री दहाच्या सुमारास हा प्रकार घडला. गोळीबारात शेख मुसा हे जखमी झाले असून त्यांच्या गुडघ्याला गोळी लागली आहे. त्यांच्यावर गेवराई शहरातील खासगी रुग्णालयात उपचार सुरू आहेत. या प्रकरणी गेवराई पोलीस ठाण्यात पाच जणांविरोधात गुन्हा दाखल करण्यात आला असून, पोलिसांनी तिघांना ताब्यात घेतले आहे.
मिळालेल्या माहितीनुसार, शेख मुसा यांचा त्यांच्या पहिल्या पत्नी आणि तिच्या मुलासोबत काही काळापासून कौटुंबिक वाद सुरू होता. सोमवारी रात्री पहिल्या पत्नीच्या बाजूचे काही जण संजयनगर परिसरातील मुसा यांच्या घराजवळ आले. त्यानंतर दोन्ही बाजूंच्या व्यक्तींमध्ये वाद आणि बाचाबाची सुरू झाली. काही वेळातच हा वाद अधिक वाढला.
यावेळी मंगेश धुराजी शिंदे याने गावठी कट्टा काढून शेख मुसा यांच्यावर गोळी झाडल्याचा आरोप आहे. गोळी त्यांच्या गुडघ्याला लागल्याने ते गंभीर जखमी झाले. गोळीबाराच्या आवाजामुळे परिसरात एकच खळबळ उडाली. नागरिकांनी घटनास्थळी धाव घेत जखमी मुसा यांना उपचारासाठी खासगी रुग्णालयात दाखल केले.
घटनेची माहिती मिळताच गेवराई पोलिसांचे पथक घटनास्थळी पोहोचले. पोलिसांनी प्रकरणाची माहिती घेत तपास सुरू केला. पोलीस निरीक्षक किशोर पवार यांच्या माहितीनुसार, या प्रकरणी पाच आरोपींविरोधात विविध कलमांनुसार गुन्हा दाखल करण्यात आला आहे. त्यापैकी तीन आरोपींना पोलिसांनी ताब्यात घेतले आहे.
दरम्यान, गोळीबार केल्याचा आरोप असलेला मंगेश शिंदे घटनेनंतर फरार झाला आहे. त्याचा शोध घेण्यासाठी पोलिसांची पथके रवाना करण्यात आली आहेत. गोळीबारासाठी वापरण्यात आलेल्या गावठी कट्ट्याबाबतही पोलीस तपास करत आहेत. कौटुंबिक वादातून हा प्रकार घडल्याचे प्राथमिक तपासात समोर आले असून, या घटनेमागील इतर कारणे आणि सहभागी व्यक्तींची भूमिका याबाबत पोलिसांकडून अधिक तपास सुरू आहे.
