पुणे : पत्नीला अश्लील संदेश पाठवून त्रास देणाऱ्या चुलत मेहुण्याचा दाजीने खून केल्याचा धक्कादायक प्रकार पुण्यात नुकताच उघडकीस आला आहे. याप्रकरणी भारती विद्यापीठ पोलिसांनी चार जणांना बेड्या ठोकल्या आहेत.
तुषार दिलीप मेटकरी (वय ३३, रा. केशवनगर, मुंढवा), विनोद विष्णू दुपारगुडे (वय ३४ ,रा. वडगाव धायरी,) किरण अंकुश चौधरी (वय ४३, रा.नांदेड फाटा) आणि आशा तुषार मेटकरी (वय ३२, रा. केशवनगर मुंढवा ) अशी अटक करण्यात आलेल्या आरोपींची नावे आहेत. तर महादेव दुपारगुडे असे खून झालेल्या मेहुण्याचे नाव आहे. याप्रकरणी महादेव याचा भाऊ विजय दुपारगुडे याने पोलीस ठाण्यात तक्रार दिली आहे.
पोलिसांनी दिलेल्या माहितीनुसार, दोन दिवसांपूर्वी मुंबई-बंगळुरू बाह्यवळण मार्गावर दरीपुलाजवळ महादेव दुपारगुडे मृतावस्थेत सापडला होता. दुपारगुडेची ओळख पटलेली नव्हती. त्यामुळे पोलिसांनी समाजमाध्यमावर दुपारगुडेचे छायाचित्र प्रसारित केले होते. त्यानंतर दुपारगुडेचा भाऊ विजय पोलीस ठाण्यात गेला. मृतावस्थेत सापडलेला महादेव दुपारगुडे भाऊ असल्याचे त्याने सांगितले.
दरम्यान, महादेव हा आरोपी आशाला अश्लील संदेश पाठवून तिला त्रास देत होता. त्यामुळे चारही आरोपींनी महादेवला शुक्रवारी (१९ ऑगस्ट) धायरी भागात बोलावून घेतले. त्यानंतर महादेवला बेदम मारहाण केली. या मारहाणीत महादेवाचा मृत्यू झाला.
त्यानंतर महादेवचा मृतदेह रिक्षातून दरी पूल परिसरात नेण्यात आला. मृतदेह झुडपात टाकून आरोपी पसार झाले होते. पोलिसांनी तपास करुन आरोपींना पकडले. सुरुवातीला आरोपींनी उडवाउडवीची उत्तरे दिली. तपासात त्यांनी गुन्ह्याची कबुली दिली, असे पोलीस उपायुक्त सागर पाटील यांनी पत्रकारांशी बोलताना सांगितले.
हि कारवाई भारती विद्यापीठ पोलीस ठाण्याचे वरिष्ठ पोलीस निरीक्षक जगन्नाथ कळसकर, सहायक पोलीस निरीक्षक अमोल रसाळ, उपनिरीक्षक नितीन शिंदे, अभिनय चौधरी, रवींद्र चिप्पा धीरज गुप्ता, गौरव देव, अंकुश कर्चे, आशिष गायकवाड आणि मितेश चोरमले यांच्या पथकाने केली आहे.
