पुणे : मान्सूनचा पाऊस संपल्यानंतर महाराष्ट्रात आता ‘ऑक्टोबर हिट’चा प्रभाव जोरात सुरू झाला आहे. मुंबई, ठाण्यासह संपूर्ण राज्यभरात उन्हाचा चटका आणि उकाडा खूप वाढला असून, नागरिक घामाघूम होत आहेत. हवामान खात्याच्या अंदाजानुसार, या महिन्याच्या शेवटच्या आठवड्यात उष्णतेच्या झळा आणखी तीव्र होणार आहेत, ज्यामुळे यंदा थंडीचे आगमन काहीसे उशिरा होण्याची चिन्हे आहेत.
राज्यात सध्या सर्वत्र उन्हाचे प्रमाण वाढले असून, कमाल तापमानात मोठी वाढ नोंदवली जात आहे. विशेषतः सोलापूरमध्ये पारा 37.9 अंश सेल्सिअसवर पोहोचला आहे. तसेच विदर्भातील यवतमाळ आणि अमरावती या जिल्ह्यांमध्येही कमाल तापमान 37 अंश सेल्सिअसच्या पुढे गेले आहे. दुपारच्या वेळी बाहेर पडणे कठीण झाले असून, उन्हाच्या तीव्रतेमुळे सर्वसामान्य नागरिक त्रस्त झाले आहेत.
दुसरीकडे पुणे, मुंबई, ठाणे आणि किनारपट्टीवरील कोकण भागात दमट वातावरणामुळे नागरिकांची मोठी अस्वस्थता वाढली आहे. हवेतील आर्द्रता जास्त असल्यामुळे घामाच्या धारा वाहत आहेत आणि प्रचंड उकाडा जाणवत आहे. या उष्ण वातावरणातून थोडा दिलासा मिळण्याची शक्यता तूर्तास कमीच आहे.
अशातच हवामान विभागाने पावसाबाबत एक नवीन अंदाज वर्तवला आहे. त्यानुसार, 22 आणि 23 ऑक्टोबर रोजी दक्षिण कोकण-गोवा तसेच दक्षिण मध्य महाराष्ट्रातील काही ठराविक भागांत हलका पाऊस किंवा मेघगर्जनेसह पाऊस पडण्याची शक्यता आहे. या अवकाळी पावसाच्या हलक्या सरींमुळे वातावरणात थोडाफार बदल होऊ शकतो, मात्र यामुळे उन्हाच्या त्रासापासून फारसा दिलासा मिळण्याची शक्यता नाही.
एकंदरीत, यावर्षी ऑक्टोबरच्या उष्णतेने नागरिकांना चांगलेच त्रस्त केले असून, गुलाबी थंडीची वाट पाहत असलेल्या लोकांना आणखी काही दिवस उकाड्याचा सामना करावा लागणार आहे
