पुणे : पुणे विभाग शिक्षक व पदवीधर मतदारसंघाच्या आगामी निवडणुकीसाठी पिंपरी चिंचवड पोलीस आयुक्तालयाने तयारी पूर्ण केली आहे. आगामी 23 ऑक्टोबर रोजी मतदान आणि 27 ऑक्टोबर रोजी मतमोजणी होणार असून, ही संपूर्ण प्रक्रिया शांततापूर्ण वातावरणात पार पाडण्यासाठी पोलिसांनी कडक निर्बंध लागू केले आहेत. या कार्यक्षेत्रात एकूण 20 मतदान केंद्रांवर आणि 35 बुथवर मतदानाची प्रक्रिया पार पडणार आहे.
निवडणूक प्रचाराची मुदत संपल्यानंतर आणि मतदान प्रक्रिया पूर्ण होईपर्यंत संबंधित मतदारसंघाबाहेरून आलेल्या राजकीय व्यक्ती किंवा राजकीय पक्षांच्या पदाधिकाऱ्यांना त्या क्षेत्रात थांबण्यास मनाई करण्यात आली आहे. तसेच कायदा आणि सुव्यवस्था कायम राखण्यासाठी भारतीय नागरिक सुरक्षा संहिता 2013 च्या कलम 163 नुसार शस्त्र बाळगण्यावर पूर्ण बंदी घालण्यात आली आहे. छाननी समितीने विशेष सवलत दिलेल्या व्यक्तींना जरी परवाना असला, तरी त्यांनाही निवडणुकीच्या काळात शस्त्र जवळ बाळगण्यास सक्त प्रतिबंध आहे.
मतदान आणि मतमोजणी केंद्राच्या 100 मीटर परिघात येणारी सर्व दुकाने, हॉटेल्स, टपऱ्या आणि व्यावसायिक आस्थापना बंद ठेवण्याचे आदेश देण्यात आले आहेत; मात्र यामध्ये अत्यावश्यक सेवांना वगळण्यात आले आहे. कर्तव्यासह असणारे शासकीय अधिकारी वगळता इतर कोणालाही मतदान केंद्राच्या परिसरात कोणत्याही प्रकारचे हत्यार किंवा अग्निशस्त्र घेऊन जाण्यास परवानगी असणार नाही.
सुरक्षिततेचा भाग म्हणून मतदान केंद्र व परिसरात मोबाईल फोन, लॅपटॉप किंवा इतर कोणत्याही प्रकारचे इलेक्ट्रॉनिक गॅझेट्स वापरण्यास किंवा सोबत नेण्यास सक्त मनाई आहे. केवळ निवडणुकीच्या कर्तव्यावर असलेले अधिकारी आणि कर्मचारी यांनाच या नियमांमधून सूट देण्यात आली आहे. या आदेशांचे उल्लंघन करणाऱ्या व्यक्तींवर भारतीय न्याय संहिता 2023 च्या कलम 223 अंतर्गत कायदेशीर कारवाई केली जाईल, अशी महत्त्वाची माहिती पोलीस सह आयुक्त डॉ. शशिकांत महावरकर यांनी दिली आहे.
