लहू चव्हाण
पाचगणी : महाराष्ट्र राज्य लॉन टेनिस असोसिएशन आणि ऑल इंडिया टेनिस असोसिएशन यांच्या वतीने आयोजित करण्यात आलेल्या ‘१६ व्या रवाईन हाॅटेल सुपर सिरीज टेनिस स्पर्धेत मुलींच्या गटातून कर्नाटकच्या कृतीका पद्मकुमार तर मुलांच्या गटातून पुण्याच्या सुमित उंडरेने विजेतेपद पटकावले.
मुलींच्या गटाच्या अंतिम फेरीत कृतिका पद्मकुमारने सृष्टी किरणचे आव्हान मोडून काढताना विजेतेपद पटकावले. मुलांच्या गटातून सुमित उंडरेने नामिश हूडला पराभूत करताना विजेतेपदावर शिक्कामोर्तब केले. या स्पर्धेसाठी चेन्नई येथील सरवणन पाॅलराज यांनी काम पाहिले.
स्पर्धेचे बक्षीस वितरण रवाईन हाॅटेलचे संचालक तथा राज्यस्तरीय टेनिस खेळाडू जावेद सुनेसरा यांच्या हस्ते करण्यात आले. यावेळी संयोजक रजाकभाई सुनेसरा यांच्यासह अनेक मान्यवर उपस्थित होते. विजेत्या खेळाडूंना चषक व रोख पारितोषिक देऊन सन्मानित करण्यात आले.
जावेद सुनेसरा यांनी हॉटेल रवाईनच्या वतीने गेली तीन वर्षे मॅरेथॉन स्पर्धा आयोजित करण्यात येत असल्याचे यावेळी सांगितले. या स्पर्धेत महाराष्ट्र, कर्नाटक, गुजरात, तामिळनाडू, हरियाणा आदी राज्यांतून १२ वर्षांखालील गटाचे सुमारे १२० हून अधिक स्पर्धकांनी सहभाग नोंदवला होता.
