IND vs NZ : भारत आणि न्यूझीलंड यांच्यात सुरू असलेल्या एकदिवसीय मालिकेत दोन सामने पार पडले असून मालिका सध्या 1-1 अशी बरोबरीत आहे. पहिला सामना भारताने जिंकताच भारतीय संघाला मोठी गुड न्यूज मिळाली होती. मात्र दुसरा सामना गमावल्यानंतर आता भारतासमोर, विशेषतः विराट कोहलीसाठी, मोठे आव्हान उभे राहिले आहे.
पहिला एकदिवसीय सामना जिंकल्यानंतर विराट कोहलीने आयसीसी वनडे फलंदाज क्रमवारीत पुन्हा एकदा अव्वल स्थान पटकावले. न्यूझीलंडविरुद्धच्या या सामन्यात त्याने 93 धावांची जबाबदार खेळी करत दमदार पुनरागमन केले. बराच काळ नंबर-वन स्थानापासून दूर असलेल्या कोहलीसाठी ही एक विशेष कामगिरी ठरली.
मात्र दुसऱ्या एकदिवसीय सामन्यात कोहलीला अपेक्षित कामगिरी करता आली नाही. त्याने फक्त 23 धावा केल्या आणि या अपयशाचा थेट परिणाम त्याच्या रँकिंगवर झाला. त्यामुळे त्याचे अव्वल स्थान आता धोक्यात आले आहे.
दुसरीकडे, न्यूझीलंडचा स्टार फलंदाज डॅरिल मिशेल जबरदस्त फॉर्ममध्ये आहे. पहिल्या सामन्यात त्याने 84 धावा केल्या, तर दुसऱ्या सामन्यात नाबाद 131 धावांची खेळी करत भारतीय गोलंदाजांची पुरती दाणादाण उडवली. या शानदार कामगिरीमुळे मिशेल आयसीसी क्रमवारीत विराट कोहलीच्या अगदी जवळ पोहोचला आहे.
सध्या विराट कोहलीकडे 785 रेटिंग गुण असून डॅरिल मिशेलकडे 784 गुण आहेत. म्हणजेच केवळ एका गुणाचा फरक आहे. त्यामुळे तिसरा एकदिवसीय सामना हा पुढील नंबर-वन फलंदाज कोण असणार, हे ठरवणारा ठरणार आहे. (IND vs NZ)
या रँकिंग अपडेटमध्ये भारतीय कर्णधार रोहित शर्मालाही धक्का बसला असून तो दोन स्थानांनी घसरत तिसऱ्या क्रमांकावर आला आहे. आगामी सामने भारतीय फलंदाजांसाठी अत्यंत निर्णायक ठरणार आहेत.
विराट कोहलीसाठी ही 11 वी वेळ आहे, जेव्हा त्याने आयसीसी वनडे क्रमवारीत अव्वल स्थान मिळवले आहे. त्याने पहिल्यांदा 2013 मध्ये नंबर-वन स्थान पटकावले होते. एकूण 800 दिवसांहून अधिक काळ तो वनडे क्रमवारीत अव्वल स्थानावर राहिला आहे, जी कोणत्याही भारतीय फलंदाजासाठी अभिमानास्पद कामगिरी आहे.
आता सर्वांचे लक्ष तिसऱ्या आणि निर्णायक एकदिवसीय सामन्याकडे लागले असून, विराट कोहली केवळ संघासाठीच नव्हे तर आपले नंबर-वन स्थान वाचवण्यासाठीही मैदानात उतरणार आहे.
