पुणे: चेन्नई सुपर किंग्स (CSK) आणि पराभव हे समीकरण चाहत्यांच्या पचनी पडणारं नाही, पण सध्या मैदानात तेच घडताना दिसतंय. राजस्थान, पंजाब आणि आता आरसीबीकडून पराभव झाला. सलग पराभवाचा धडाका लागल्यामुळे चॅम्पियन राहिलेल्या चेन्नईच्या गोटात चिंतेचं वातावरण आहे. ऋतुराज गायकवाडच्या नेतृत्वाखाली टीमला विजय मिळणे कठीण झाले असून, चाहत्यांचे डोळे आता फक्त एकच चेहरा शोधतोय, तो म्हणजे ‘थाला’ महेंद्रसिंह धोनी!
मैदानात धोनीची उपस्थिती केवळ फलंदाजीसाठी नाही, तर रणनीतिक सल्ल्यासाठीही महत्त्वाची असते. सध्या डगआऊटमध्ये धोनी नसल्याने ऋतुराज मैदानावर काहीसा एकाकी पडल्याचं चित्र दिसत आहे.
धोनी का खेळत नाहीये?
चेन्नईचा खरा संकटमोचक धोनी सध्या खेळत का नाही, याचं उत्तर अखेर ऋतुराजने दिलं आहे. 44 वर्षीय धोनी सध्या स्नायूंच्या दुखापतीमुळे त्रस्त आहे. वयाच्या या टप्प्यावर अशा दुखापतीतून सावरण्यासाठी शरीर थोडा जास्त वेळ घेतो. सध्या धोनी ‘रिहॅबिलिटेशन’ प्रक्रियेतून जात आहे. ऋतुराजने दिलेल्या माहितीनुसार, धोनी पहिले दोन आठवडे खेळणार नाही.
धोनी स्वत: खेळण्यासाठी प्रचंड उत्सुक असून लवकरच पूर्ण बरा होऊन परतणार आहे. ही चाहत्यांसाठी दिलासादायक बाब आहे. धोनी पुन्हा संघात परतल्यावर कॅप्टन्सीच्या निर्णयांमध्ये काही बदल होणार का, की तो केवळ मार्गदर्शकाच्या भूमिकेत राहणार, याकडे सर्वांचे लक्ष लागले आहे.
