Pune Crime : पुणे: पुणे सोलापूर राष्ट्रीय महामार्गावर पुन्हा एकदा एक धक्कादायक प्रकार समोर आला असून एका हॉटेल आणि लॉजमध्ये सुरू असलेल्या बेकायदेशीर व्यवसायाचा पोलिसांनी पर्दाफाश केला आहे. इंदापूर तालुक्यातील गागरगावच्या हद्दीत असलेल्या हॉटेल कल्याण ॲग्रो आणि हॉटेल 96 कट्टा या दोन ठिकाणी अनैतिक देहव्यापार सुरू असल्याची माहिती पोलिसांना मिळाली होती. या माहितीच्या आधारे इंदापूर पोलिसांनी अचानक छापा टाकून ही धडक कारवाई केली आहे.
मिळालेल्या माहितीनुसार पोलीस निरीक्षक विलास नाळे यांना एका गुप्त बातमीदाराकडून या गैरप्रकाराबद्दल माहिती मिळाली होती. या माहितीची खातरजमा केल्यानंतर 3 एप्रिल रोजी रात्री 9 वाजण्याच्या सुमारास इंदापूर पोलिसांच्या पथकाने या दोन्ही हॉटेलवर सापळा रचून धाड टाकली. या कारवाई दरम्यान तिथे काही महिला आणि मुलींकडून जबरदस्तीने देहव्यापार करून घेतला जात असल्याचे पोलिसांच्या निदर्शनास आले.
या कारवाईत पोलिसांनी घटनास्थळावरून काही रोख रक्कम आणि इतर आक्षेपार्ह साहित्य जप्त केले आहे. महिला पोलीस कर्मचाऱ्यांनी तिथे असलेल्या एका महिला एजंटची तपासणी केली असता तिच्याकडे 2,000 रुपये रोख सापडले. पोलिसांनी या संपूर्ण कारवाईत एकूण 3,375 रुपयांचा मुद्देमाल ताब्यात घेतला आहे. या प्रकरणी पोलीस फौजदार शुभांगी खंडागळे यांनी तक्रार दाखल केली आहे.
या तक्रारीनंतर पोलिसांनी हॉटेल मालक दीपक उर्फ ज्ञानदेव सिताराम ढवळे आणि संबंधित महिला एजंट यांच्या विरोधात अनैतिक व्यापार प्रतिबंधक कायद्याच्या विविध कलमान्वये गुन्हा नोंदवला आहे. या प्रकरणाचा पुढील तपास पोलीस निरीक्षक विलास नाळे स्वतः करत आहेत. पुणे सोलापूर महामार्ग हा अत्यंत वर्दळीचा रस्ता मानला जातो आणि अशा मुख्य रस्त्यावरील हॉटेल्समध्ये हे प्रकार सुरू असल्याने नागरिकांमध्ये मोठी खळबळ उडाली आहे. महामार्गावर अशा प्रकारे सुरू असलेल्या अनैतिक कामांवर पोलिसांनी वेळीच लगाम लावल्याने त्यांचे कौतुक होत आहे.
