केडगाव : केडगाव (ता.दौंड) येथे दोन जणांवर धारदार शस्त्राने वार केल्याची घटना मंगळवारी (दि.11) सायंकाळी साडेसहाच्या सुमारास घडली. हे दोघे आयुष रेसिडेन्सी जगताप वस्ती येथे आले असता त्यांच्यावर चार ते पाच जणांनी धारदार शस्त्राने हल्ला चढवला. यामध्ये या दोघांच्या हातावर, डोक्याला गंभीर जखमा झाल्या.
हर्षद बाळासो गायकवाड आणि राहुल बाबुराव गायकवाड (दोघेही रा. केडगाव, आयुष रेसिडेन्सी, जगताप वस्ती) अशी जखमींची नावे आहेत. याबाबत पोलिसांनी सांगितले की, ‘जखमी दोघांवर अंदाजे चार ते पाच जणांनी धारदार शस्त्राने वार करण्यात आल्याची शक्यता आहे. मात्र, या हल्ल्यामागचे कारण अद्याप समोर आले नाही. या दोघांवर हल्ला करून आरोपी फरार झाले असून, पोलिस त्यांचा शोध घेत आहेत’.
जखमींना रुग्णालयात दाखल
दरम्यान, हर्षद आणि राहुल हे दोघे या हल्ल्यात गंभीररित्या जखमी झाले. त्यामुळे त्यांना तातडीने केडगाव येथील मोहन हॉस्पिटल येथे दाखल करण्यात आले. त्यांना पुढील उपचारासाठी पुणे येथे हलविण्यात असल्याचे सांगण्यात येत आहे.
वरिष्ठ अधिकाऱ्यांची घटनास्थळी धाव
या घटनेची माहिती मिळताच उपविभागीय पोलीस अधिकारी स्वप्नील जाधव, यवत पोलीस ठाण्याचे वरिष्ठ पोलीस निरीक्षक हेमंत शेडगे, पोलीस उपनिरीक्षक स्वप्नील लोखंडे, कापरे यांनी घटनास्थळी धाव घेतली. याप्रकरणाचा पुढील तपास यवत पोलीस करत आहेत.
