मुंबई : भारतीय क्रिकेट नियामक मंडळाने (बीसीसीआय) सोमवारी (24 मार्च) ला महिला क्रिकेटपटूंच्या केंद्रीय कराराची घोषणा केली. महिला क्रिकेटपटूंच्या केंद्रीय कराराची यादी बीसीसीआयने तीन श्रेणींमध्ये विभागली आहे. यामध्ये ग्रेड ए अंतर्गत तीन खेळाडूंचा समावेश केला आहे. ग्रेड ए यादीच्या अंतर्गत हरमनप्रीत कौर, स्मृती मानधना आणि दीप्ती शर्मा यांचा समावेश आहे. तर 4 खेळाडूंनी ग्रेड बी मध्ये आपले स्थान निश्चित केले आहे. या व्यतिरिक्त 9 खेळाडूंना ग्रेड सी मध्ये स्थान देण्यात आले आहे.
महिलांच्या केंद्रीय करारात ‘या’ 16 खेळाडूंचा समावेश…
ग्रेड ए : हरमनप्रीत कौर, स्मृती मानधना, दीप्ती शर्मा.
ग्रेड बी : रेणुका सिंग, जेमिमा रॉड्रिग्ज, रिचा घोष, शफाली वर्मा.
ग्रेड सी : राधा यादव, श्रेयंका पाटील, यास्तिका भाटिया, तितस साधू, अरुंधती रेड्डी, अमनजोत कौर, उमा छेत्री, स्नेहा राणा, पूजा वस्त्रकर.
महिला खेळाडूला मिळणारी रक्कम किती?
समोर आलेल्या माहितीनुसार, ग्रेड ए मधील हरमनप्रीत कौर, स्मृती मानधना आणि दीप्ती शर्मा यांना प्रत्येकी 50 लाख रुपये मिळणार आहेत. तर, रेणुका ठाकूर, जेमिमा रॉड्रिग्ज, रिचा घोष आणि शेफाली वर्मा यांना प्रत्येकी 30 लाख रुपये दिले जाणार आहेत. याशिवाय, ग्रेड सी मध्ये समाविष्ट असलेल्या सर्व 9 महिला खेळाडूंना दरवर्षी प्रत्येकी 10 लाख रुपये मिळतील.
