इस्लामाबाद: अर्शद नदीमने पॅरिस ऑलिम्पिकमध्ये झालेल्या भालाफेक स्पर्धेत सुवर्णपदक पटकावले आहे. सुवर्णपदक जिंकून तो या खेळाचा नवा ऑलिम्पिक चॅम्पियन बनला. ऑलिम्पिक चॅम्पियन बनल्यानंतर अर्शद पाकिस्तानात परतला, तेव्हा त्याचे जबरदस्त स्वागत झाले. त्यानंतर तो त्याच्या घरी गावी गेला, तिथेही त्याच्या स्वागतात कोणतीही कमतरता नव्हती. पण, सुवर्णपदक जिंकल्याचा आनंद साजरा करण्यासाठी सासरच्यांनी त्याला एक म्हैस भेट दिली, तेव्हा त्याला आश्चर्य वाटले.
सासरच्यांनी अर्शद नदीमला म्हैस भेट दिली
अर्शद नदीम पाकिस्तानात पोहोचण्यापूर्वीच त्याच्यावर बक्षिसांचा वर्षाव करण्यात आला. ज्याला जमेल, तो आपल्या चॅम्पियन खेळाडूला काहीतरी देण्याची घोषणा करत होता. आता सगळे जग जावयाला भेटवस्तू देत असताना सासरे मागे कसे राहणार? अशा परिस्थितीत गावातील वातावरण आणि परंपरेशी जुळवून घेत त्यांनी आपल्या जावयाला म्हैस भेट देण्याचा निर्णय घेतला.
गावात म्हैस भेट देणे आदरणीय
अर्शद नदीमच्या सासऱ्याने म्हैस भेट देण्याचे कारण सांगितले. ते म्हणाले की, म्हैस भेट देणे हे त्यांच्या गावात खूप मौल्यवान आणि आदरणीय मानले जाते. ते पुढे म्हणाले की, नदीमला आपल्या गावाचा खूप अभिमान आहे. इतकं यश मिळूनही त्यांनी गाव सोडलं नाही. तो अजूनही आई-वडील आणि भावांसोबत राहतो.
अर्शद नदीमच्या सासऱ्याच्या म्हणण्यानुसार तो त्याचा सर्वात लहान जावई आहे. त्यांनी सांगितले की, त्यांना 4 मुले आणि 3 मुली आहेत, त्यापैकी सर्वात धाकटी मुलगी आयशा हिचे लग्न नदीमशी झाले आहे. सासऱ्यांनी पुढे सांगितले की, जेव्हा त्यांनी आपल्या धाकट्या मुलीचे लग्न नदीमशी करायचे ठरवले, तेव्हा तो लहानमोठ्या नोकऱ्या करत असे. पण, त्याला सुरुवातीपासूनच खेळाबद्दल खूप आवड होती. तो शेतात भाला फेकण्याचा सराव करायचा.
ऑलिम्पिक चॅम्पियन अर्शद नदीम
अर्शद नदीमने पॅरिस ऑलिम्पिकमध्ये ९२.९७ मीटर भालाफेक करून सुवर्णपदक जिंकले आहे. या गेममध्ये भारताचा नीरज चोप्रा दुसरा स्थानावर राहिला.
