बारामती : राज्यात स्थानिक स्वराज्य संस्थांच्या निवडणुकांची तयारी सुरू असतानाच, मावळ तालुका राष्ट्रवादी काँग्रेस (शरदचंद्र पवार गट) च्या कार्यकर्ता आढावा बैठकीत राजकीय वातावरण चांगलेच तापले. या बैठकीत बोलताना युवा नेते युगेंद्र पवार यांनी उपमुख्यमंत्री अजित पवार आणि मावळचे आमदार सुनील शेळके यांना थेट नाव न घेता जोरदार टोला लगावला आहे.
कार्यकर्त्यांशी संवाद साधताना युगेंद्र पवार म्हणाले, “बारामतीमध्ये आजही मोठ्या प्रमाणात दहशत आहे. आणि मावळात जे आमदार आहेत, त्यांचे खरे बॉस बारामतीमध्ये बसलेले आहेत.” असे वक्तव्य युगेंद्र पवार यांनी केले आहे.
या बैठकीमध्ये पक्ष संघटना मजबूत करणे, आगामी निवडणुकांची रणनीती आणि स्थानिक प्रश्नांवर चर्चा करण्यात आली. यावेळी पुणे जिल्हाध्यक्ष आमदार जगन्नाथ बापू शेवाळे, युवक जिल्हाध्यक्ष प्रमोदसिंह गोतारणे, ओबीसी विभाग जिल्हाध्यक्ष प्रमोद गोतारणे आणि मावळचे अध्यक्ष दत्ता पडवळ यांच्यासह अनेक मान्यवर उपस्थित होते.
दरम्यान, युगेंद्र पवार यांच्या या खळबळजनक वक्तव्यामुळे मावळच्या राजकारणात चर्चांना उधाण आले आहे. आता उपमुख्यमंत्री अजित पवार यावर काय उत्तर देतात, हे पाहणे महत्त्वाचे ठरणार आहे.
