भोर (पुणे) : भोर-शिरवळ मार्गावरील वडगाव डाळ (ता. भोर) येथील वळणावर दोन दुचाकींच्या विचित्र अपघातात डंपरखाली चिरडल्याने दुचाकीवरील एकाचा मृत्यू झाला. हा अपघात मंगळवार १८ जून रोजी घडला आहे. विलास धोंडिबा कोंढाळकर (वय ३५, रा. पान्हवळ, ता. भोर) असे मृत्यू झालेल्या तरुणाचे नाव आहे.
या प्रकरणी दत्तात्रय कोंडिबा साळेकर (रा. म्हाकोशी) यांनी भोर पोलीस स्टेशनमध्ये फिर्याद दिली आहे. पोलिसांनी दिलेल्या माहितीनुसार, वडगाव डाळ येथील वळणावर शिरवळ बाजूने येणारी एमएच ०४ सीएक्स १६८ व भोरकडून शिरवळकडे जाणाऱ्या एमएच १२ पीजे ६८७१ या दोन दुचाकींची समोरासमोर धडक बसली. या वेळी शिरवळवरून येणाऱ्या दुचाकीवरील पाठीमागे बसलेला तरुण रस्त्याच्या मधोमध पडला. त्याच्या अंगावरून डंपर (एमएच १२ आरएन ८११९) गेल्याने त्याचा जागीच मृत्यू झाला. या अपघातातील जखमी तिघांना भोरमधील खासगी रुग्णालयात उपचारासाठी दाखल करण्यात आले आहे.
पुढील तपास पोलीस निरीक्षक अण्णा जाधव यांच्या मार्गदर्शनाखाली उपनिरीक्षक अनिल चव्हाण, शीला खोत, अशोक खुटवड, हवालदार उद्धव गायकवाड, सुनील चव्हाण करीत आहेत.
