पुणे : जडीबुटीच्या विक्री करता रस्त्याच्या बाजूला लावण्यात आलेल्या तंबूमध्ये एका महिलेचा हातोड्याने ठेचून खून करण्यात आल्याची धक्कादायक घटना समोर आली आहे. ही घटना शनिवारी पहाटे बिबवेवाडीमधील गंगाधाम येथील आई माता मंदिराच्या जवळ घडली. या प्रकरणी एका संशयिताला पोलिसांकडून ताब्यात घेण्यात आले आहे. मृत महिलेची ओळख मात्र अद्याप पटलेली नाही.
पुण्यातील बिबवेवाडी येथील आई माता मंदिराजवळ जडीबुटी विक्री करण्यासाठी एक तंबू उभारण्यात आलेला आहे. हा तंबू अनेक महिन्यांपासून या ठिकाणी आहे. या तंबुमध्येच एका महिलेचा हातोड्याने ठेचून खून करण्यात आल्याची माहिती पोलिसांना मिळाली होती. पोलिसांनी घटनास्थळी दाखल होत मृतदेह ताब्यात घेऊन शवविच्छेदनासाठी ससूनला पाठवला आहे. दरम्यान, पोलिसांनी एका संशयिताला ताब्यात घेतले आहे. हा प्रकार नेमका कशामुळे घडला याचा शोध पोलिसांकडून घेतला जात आहे.
