-अक्षय टेमगिरे
रांजणगाव गणपती : शिरुर तालुक्यातील आंधळगाव येथे लग्नासाठी आलेल्या महिलेच्या गळ्यातील तब्बल 4 लाख 20 हजार रुपये किमतीचे सहा तोळे वजनाचे मंगळसूत्र दुचाकीवरून आलेल्या चोरट्यांनी हिसकावून नेले आहे. याबाबत शिरूर पोलिस स्टेशन येथे गुन्हा दाखल करण्यात आला आहे.
याप्रकरणी सुनीता अप्पासाहेब गोळेकर (सध्या रा. कमल पार्क, शिरूर, ता. शिरूर, मूळ रा. वडगाव रासाई, ता. शिरूर) यांनी शिरूर पोलिस ठाण्यात फिर्याद दिली आहे.
पोलिसांनी दिलेल्या माहितीनुसार, सुनीता गोळेकर या पती व कुटुंबासह रविवारी त्या आंधळगाव येथील शुभम मंगल कार्यालय येथे पती व मुलीसह लग्नासाठी गेल्या असता. दरम्यान, त्यांनी त्यांची गाडी न्हावरा ते केडगाव चौफुला रस्त्याच्या कडेला उभी केली होती. लग्नाचा कार्यक्रम उरकल्यानंतर गोळेकर कुटुंब त्यांच्या गाडी जवळ जात होते. यावेळी न्हावरा बाजुकडून समोरून एका दुचाकीवरून अनोळखी तीन जण त्यांच्या जवळ आले व त्या चोरट्यांनी सुनीता गोळेकर यांच्या गळ्यातील सहा तोळे वजनाचे मंगळसूत्र हिसकावले व दुचाकीवरून भरधाव वेगात ते निघून गेले.
याबाबत पोलिसांनी तीन अज्ञात चोरट्यांवर गुन्हा दाखल केला आहे. याप्रकरणाचा पुढील तपास पोलिस निरीक्षक संदेश केंजळे यांच्या मार्गदर्शनाखाली पोलिस पो. सई चव्हाण करत आहेत.
