पुणे : पुणे महापालिकेकडून पाणी कपात टाळण्यासाठी अनेक प्रयत्न केले जात आहे. त्यात आता शहराला पाणीपुरवठा करणाऱ्या खडकवासला धरण साखळी प्रकल्पातील घटत्या पाणीसाठ्यामुळे पाणीकपातीचे संकट आहे. असे असताना पाणी बचतीला महापालिकेने प्राधान्य दिले जात आहे. या बचतीतून दररोज २०० दशलक्ष लिटर पाणी वाचवण्याचे नियोजन असल्याचे सांगितले जात आहे.
पुणे कॅन्टोन्मेंट ते फुरसुंगी जलवाहिनीतून १५० दशलक्ष लीटर पाण्याबरोबरच पाणीपुरवठा यंत्रणेतून ५० दशलक्ष अशा एकूण २०० दशलक्ष लीटर पाण्याची बचत करण्याचा निर्णय पाणीपुरवठा विभागाने घेतला आहे. खडकवासला साखळी प्रकल्पातील पाणीसाठा कमी होत असल्याने शहरावर पाणीटंचाईचे सावट निर्माण झाले आहे. खडकवासला प्रकल्पात २४.१० अब्ज घनफूट (टीएमसी) पाणीसाठा शिल्लक असला, तरी त्यापैकी ८.५४ टीएमसी पाणी रब्बी हंगामासाठी आरक्षित आहे. त्यामुळे शहरासाठी असलेल्या १५.५० टीएमसी पाणीसाठ्याचे जूनपर्यंतचे नियोजन महापालिकेला करावे लागणार आहे.
शहराची तहान भागवण्यासाठी प्रतिदिन १ हजार ६५० दशलक्ष लीटर (एमएलडी) पाण्याची आवश्यकता आहे. त्यामुळे संभाव्य पाणी कपात टाळण्यासाठी महापालिकेने पाण्याचा दैनंदिन वापर मर्यादित ठेवण्याबाबतच्या सूचना जलसंपदा विभागाने महापालिकेला पत्राद्वारे दिल्या आहेत.
फुरसुंगीला लवकरच जलवाहिनीद्वारे पाणीपुरवठा होणार
महापालिका हद्दीत समाविष्ट झालेल्या फुरसुंगी गावाला लवकरच जलवाहिनीद्वारे पाणीपुरवठा होणार आहे. जलवाहिनी टाकण्याचे काम अंतिम टप्प्यात आले असून, त्यामुळे १५० एमएलडी एवढ्या पाण्याची बचत होणार आहे.
