पुणे: वैष्णवी हगवणे मृत्यू प्रकरणातील आरोपींना बुधवारी कोर्टात हजर करण्यात आले, दरम्यान, वैष्णवी हगवणेच्या आत्महत्ये प्रकरणी पोलिसांनी कोर्टाला धक्कादायक माहिती दिली असून या प्रकरणाला आता नावे वळण लागले आहे. न्यायालयीन सुनावणीदरम्यान, पोलिसांनी या प्रकरणातील नवीन तपशील उघड केले, ज्यामध्ये तिचा पती शशांकने वैष्णवीवर केलेल्या शारीरिक छळाचे पुरावे समाविष्ट आहेत. शवविच्छेदन अहवालात तिच्या शरीरावर ३० जखमांच्या खुणा आढळल्या होत्या, त्यापैकी १५ जखमांच्या खुणा तिच्या मृत्यूपूर्वी २४ तासांच्या आतल्या होत्या. दरम्यान, पती शशांकने वैष्णवीच्या मृत्यूच्या पाच व तीन दिवस आधी विविध हत्यारांनी तिला मारहाण केली होती. दरम्यान, शशांकने नेमक्या कोणत्या हत्यारांनी वैष्णवीला मारहाण केली याचा शोध सध्या पोलिस घेत आहेत.
पोलिसांनी न्यायालयाला सांगितले की, ते अजूनही आरोपींचे मोबाईल फोन शोधत आहेत, जे तपासासाठी महत्त्वाचा पुरावा ठरणार आहेत. पुढील तपास आणि पुरावे मिळवण्यासाठी न्यायालयाने आरोपींच्या पोलिस कोठडीत वाढ केली. दरम्यान, सह-आरोपी नीलेश चव्हाणविरुद्ध स्टँडिंग वॉरंट जारी करण्यात आला आहे, जो अद्याप फरार आहे.
वैष्णवी हगवणे प्रकरणी वैष्णवीच्या माहेरचे न्यायाची मागणी करत आहेत. पोलिस अधिक पुरावे गोळा करण्यासाठी काम करत आहेत. या प्रकरणामुळे हुंड्यासाठी छळ आणि महिलांवर होणाऱ्या हिंसाचाराबद्दल चिंता व्यक्त केली जात आहे.
