उरुळी कांचन : पूर्व हवेलीतील खामगाव टेक (ता. हवेली ) ग्रामपंचायत हद्दीतील खामगाव वस्ती व भवरापुर परिसरातील रोहित्र अज्ञात चोरट्यांनी फोडून, रोहित्रांच्या आतील सुमारे ८० हजार रुपये किमतीच्या तांब्याच्या तारा चोरल्याची घटना घडली आहे. सोमवारी (ता. ०३) ते शुक्रवारी (ता. ०७) भवरापुर येथील सोसायटी वस्ती येथे ही घटना घडली आहे. याप्रकरणी अज्ञात चोरट्यांच्या विरोधात उरुळी कांचन पोलीस ठाण्यात गुन्हा दाखल करण्यात आला आहे.
याप्रकरणी गणेश हनुमंत धुमाळ (रा. डाळिंब रोड, उरूळी कांचन ता. हवेली), यांनी शनिवारी (ता. १५) उरुळी कांचन पोलीस ठाण्यात फिर्याद दिली आहे. पोलिसांनी दिलेल्या माहितीनुसार, भवरापूर (ता. हवेली) ग्रामपंचायत हद्दीतील बाळू अबू खामगाव ते डीपी खामगाव वस्ती व भवरापुर येथील सोसायटी नंबर 4 सोसायटी वस्तीमध्ये रोहित्र बसविण्यात आले आहे. हे रोहित्र अज्ञात चोरट्यांनी फोडून रोहीत्रातील ८० हजार रुपये किमतीच्या ८० किलो तांब्याच्या तारा चोरून नेल्या आहेत.
रोहित्रात असलेल्या 210 लिटर ऑइलचे नुकसान सुद्धा झाले आहे. याप्रकरणी धुमाळ यांनी दिलेल्या तक्रारीनुसार अज्ञात चोरट्यांच्या विरोधात उरुळी कांचन पोलीस ठाण्यात गुन्हा दाखल करण्यात आला आहे. पुढील तपास पोलीस करीत आहेत. दरम्यान, पूर्व हवेलीतील हिंगणगाव, तरडे, सोरतापवाडी, कोरेगाव मूळ या गावामधून रोहित्रांच्या आतील तांब्याच्या तारा चोरून नेण्याचे प्रमाण वाढले आहे. त्यातच आता भवरापूर येथील रोहीत्रातील तांब्याच्या तारा चोरून नेल्या आहेत.
