लोणी काळभोर : पुणे-सोलापूर राष्ट्रीय महामार्गावर कार व रिक्षाचा अपघात झाल्याची घटना घडली आहे. लोणी काळभोर (ता.हवेली ) ग्रामपंचायत हद्दीतील माळी मळा परिसरात असलेल्या सेल पेट्रोल पंपासमोर मंगळवारी (ता.१९ ) रात्री नऊ वाजताच्या सुमारास हा अपघात झाला. यामध्ये रिक्षाचालक सागर ननावरे यांच्यासह एक अनोळखी प्रवासी जखमी झाला आहे.
मिळालेल्या माहितीनुसार, पुण्याकडून सोलापूरच्या दिशेने जाताना कार आणि रिक्षाचा अपघात झाला आहे. दोन्ही गाड्या भरधाव वेगाने धावत होत्या. तसेच कारचा चालक दारू पिऊन गाडी चालवत असल्याचे समोर आले आहे.
दरम्यान, या घटनेची माहिती मिळताच लोणी काळभोर बीट मार्शलवर कर्तव्य बजावित असलेले पोलिस अंमलदार प्रशांत सुतार व सागर कदम तातडीने घटनस्थळी दाखल झाले. त्यानंतर नागरिकांच्या मदतीने जखमी प्रवाशांना तातडीने लोणी काळभोर येथील एका रुग्णालयात उपचारासाठी दाखल करण्यात आले आहे. पोलिसांनी कार चालकासह एकास ताब्यात घेतले आहे.
