बारामती, (पुणे) : हृदयविकाराच्या आजारामध्ये वापरले जाणारे व मानवी शरीरास घातक असलेले मिफेनटरमीन इंजेक्शन विक्री करण्यासाठी आलेल्यादोघांना बारामती पोलिसांनी ताब्यात घेतले आहे. सदर इंजेक्शन हे तरुण मुले व्यायाम करुन बॉडी बिल्डींगसाठी व व्यसन म्हणून घेत असल्याची धक्कादायक माहिती समोर आली आहे. तसेच या इंजेक्शनमुळे कायमस्वरुपी तंद्री लागणे, ब्लड प्रेशर जास्त राहणे, किडनी निकामी होणे असे दुष्परिणाम होत आहेत.
याप्रकरणी बारामती पोलिसांनी अभय सम्राट जाधव (वय २२, रा. श्रीरामनगर कसबा, बारामती ता. बारामती) व श्रीकांत अर्जुन घुले (वय २३, रा. खताळपट्टा ता. बारामती) या दोघांवर गुन्हा दाखल करत त्यांना अटक केली आहे. त्यांच्याकडून पोलिसांनी ६० इंजेक्शन जप्त केले आहेत.
बारामती शहर पोलीस ठाण्याचे वरिष्ठ पोलीस निरीक्षक संतोष घोळवे यांनी दिलेल्या माहितीनुसार, रविवारी (ता. २१) बारामती शहर पोलीस पोलीस ठाण्याच्या हद्दीत पोलिसांचे पथक गस्त घालीत असताना पिंपळी गावाच्या हद्यीमध्ये कॅनॉललगत अंधारामध्ये दोन इसम एका चारचाकी गाडीत बसलेले दिसून आले. त्यांचे नाव व पत्ता विचारता त्यांनी वरीलप्रमाणे सांगितले.
दोघांकडे चौकशी केली असता त्यांनी उडवाउडवीची उत्तरे दिली. संशय आल्याने त्यांची अंगझडती तसेच त्यांच्या कारची झडती घेतली असता त्यामध्ये मिफेनटरमीन हे मानवी शरीरास घातक असलेले ६० इंजेक्शन मिळून आले. सदर गुन्हयाचा पुढील तपास पोलीस उपनिरीक्षक युवराज घोडके हे करीत आहेत.
दरम्यान, याबाबत अन्न व औषध विभागाचे औषध निरीक्षक सचिन बुगड यांनी बारामती शहर पोलीस स्टेशन येथे भेट देऊन सदर इंजेक्शनचा उपयोग हृदयविकाराच्या आजारामध्ये केला जातो. परंतु, सध्या सदर इंजेक्शनचा उपयोग तरुण मुले व्यायाम करुन बॉडी बिल्डींगसाठी व व्यसन म्हणून करत असल्याचे सांगितले. तसेच सदर इंजेक्शनमुळे कायमस्वरुपी तंद्री लागणे, ब्लड प्रेशर जास्त राहणे, किडनी निकामी होणे असे दुष्परिणाम होत आहे.
पोलीस निरीक्षक संतोष घोळवे याबाबत बोलताना म्हणाले, “अशा प्रकारचे शरीरास घातक असणारे इंजेक्शन घेवून स्वतः च्या आरोग्याची तसेच शरीराचे अवयव कायमस्वरुपी निकामी करुन घेण्याऐवजी पारंपरिक व्यायाम करुन शरीरयष्टी कमविण्याकडे तरुणांनी भर द्यावा.”
सदरची कारवाई पोलीस निरीक्षक संतोष घोळवे यांच्या मार्गदर्शनखाली पोलीस उपनिरीक्षक युवराज घोडके, अभिजित कांबळे, अक्षय सिताप, दशरथ इंगोले, सागर जामदार, दादासाहेब जाधव, विशाल शिंदे, गौरव ठोंबरे यांनी केली आहे.
