गणेश सूळ
केडगाव/यवत : भरधाव जाणाऱ्या अज्ञात वाहनाने दुचाकीला दिलेल्या धडकेत दोन सख्ख्या भावांचा जागीच मृत्यू झाल्याची घटना घडली आहे. केडगाव (ता. दौंड) ग्रामपंचायत हद्दीतील पत्रा कंपनीजवळ रात्री हा अपघात झाला आहे.
कैलास शेळके (वय ५८) आणि पांडुरंग शेळके (वय ५६, दोघेही रा. देशमुख मळा, केडगाव, ता. दौंड) अशी अपघातात मृत्यू झालेल्या दोघांची नावे आहेत. याबाबत मिळालेल्या अधिक माहितीनुसार, पुणे-सोलापूर राष्ट्रीय महामार्गावर केडगाव-वाखारी गावच्या हद्दीतील आय.सी. कंपनीसमोर दोन सख्खे भाऊ रस्ता ओलांडत असताना अज्ञात वाहनाने त्यांना धडक दिली. या धडकेत दोघांचा मृत्यू झाला. रविवारी (ता. १०) सायंकाळी साडेसहा वाजण्याच्या सुमारास हा अपघात झाला.
पुणे-सोलापूर राष्ट्रीय महामार्ग ओलांडण्यासाठी हे दोघे भाऊ रस्त्याच्या कडेला दूचाकीवर थांबले होते. या दोघांना जोरदार धडक दिल्याने गंभीर दुखापत होऊन दोघांचाही मृत्यू झाला. याबाबत राजेंद्र जयसिंग शेळके यांच्या फिर्यादीवरून अज्ञात वाहनचालकाविरुद्ध यवत पोलीस स्टेशन येथे गुन्हा दाखल करण्यात आला आहे.
याबाबत पुढील तपास यवत पोलीस स्टेशनचे पोलीस निरीक्षक हेमंत शेडगे यांच्या मार्गदर्शनाखाली सहाय्यक पोलीस निरीक्षक बावकर हे करीत आहेत.
