लोणी काळभोर : मुलाला शाळेतून घरी घेऊन जात असताना महिलेच्या गळ्यातील सुमारे तीन तोळ्याचे मिनी गंठन दोन अज्ञात चोरट्यांनी हिसकावून दुचाकीवरून धूम ठोकली. ही घटना कुंजीरवाडी (ता. हवेली) ग्रामपंचायत हद्दीतील मारुती मंदिरासमोर सोमवारी (ता.२६) दुपारी अडीच वाजण्याच्या सुमारास घडली.
याप्रकरणी विद्या कुंजीर (वय-३४, रा. पोस्ट ऑफिसच्या शेजारी, कुंजीरवाडी, ता. हवेली) यांनी लोणी काळभोर पोलीस ठाण्यात फिर्याद दिली आहे. त्यानुसार दोन अज्ञात चोरट्यांच्या विरोधात गुन्हा दाखल करण्यात आला आहे.
View this post on Instagram
लोणी काळभोर पोलिसांनी दिलेल्या माहितीनुसार, विद्या कुंजीर या शाळा सुटल्यानंतर मुलाला शाळेतून घरी घेऊन चालल्या होत्या. दरम्यान, घराकडे जात असताना, मारुती मंदिरासमोर दुचाकीवर तोंडाला बांधून थांबलेल्या दोघांनी त्यांच्या गळ्यातील तीन तोळ्याचे सुमारे दीड लाख रुपयांचे गंठन हिसकावून पळून गेले.
दरम्यान, विद्या कुंजीर यांच्या गळ्यातील गंठन चोरीचा प्रकार सीसीटीव्ही कॅमेरात कैद झाला आहे. या सीसीटीव्ही कॅमेरात गाडीसह चोरटे कैद झाले आहेत. विद्या कुंजीर यांनी चोरट्यांचा पाठलाग केला. मात्र चोरट्यांनी दुचाकीवरून धूम ठोकली.
याप्रकरणी विद्या कुंजीर यांनी लोणी काळभोर पोलीस ठाण्यात फिर्याद दिली आहे. त्यानुसार दोन अज्ञात चोरट्यांच्या विरोधात गुन्हा दाखल करण्यात आला आहे. पुढील तपास लोणी काळभोर पोलीस ठाण्याचे वरिष्ठ पोलीस निरीक्षक शशिकांत चव्हाण यांच्या मार्गदर्शनाखाली पोलीस उपनिरीक्षक किरण धायगुडे करत आहेत.
