पुणे : शहर आणि परिसरात वाहनचोरीच्या गुन्ह्यांमध्ये वाढ झाल्याचे निदर्शनास येत आहे. दुचाकी चोरणाऱ्या अट्टल चोरट्याला कोंढवा पोलिसांनी नुकतीच अटक केली. चोरट्याकडून पाच दुचाकी जप्त करण्यात आल्या आहेत. याबाबत मिळालेल्या अधिक माहितीनुसार, अमन अलीम शेख (वय २५, रा. नवाजिश पार्क, कोंढवा खुर्द) असे अटक आरोपीचे नाव आहे. शेख याने शहरातील वेगवेगळ्या भागांतून वेळोवेळी दुचाकी चोरल्या होत्या.
दरम्यान, शेख दुचाकी विक्रीच्या तयारीत असल्याची माहिती कोंढवा पोलिसांच्या पथकाला मिळाली. पोलिसांनी सापळा लावून शेख याला पकडले. चौकशीत त्याने पाच दुचाकी चोरल्याची कबुली दिली. या प्रकरणाचा अधिक तपास पोलीस उपायुक्त विक्रांत देशमुख यांच्या मार्गदर्शनाखाली करण्यात आला. वरिष्ठ पोलीस निरीक्षक संतोष सोनवणे, पोलीस निरीक्षक संजय मोगले, सहायक निरीक्षक दिनेश पाटील, अमोल हिरवे, राहुल वंजारी, सुहास मोरे, राहुल थोरात, अभिजीत रत्नपारखी आदींनी ही कारवाई केली.
