न्हावरे: आलेगाव पागा-आरणगाव (ता.शिरूर)या ग्रुप ग्रामपंचायतीच्या सरपंच पदाच्या झालेल्या अटीतटीच्या लढतीमध्ये अनिता हरिभाऊ तोंडे यांचा एका मताने निसटता विजयी झाल्याचे निवडणूक निर्णय अधिकारी नंदकुमार खरात यांनी जाहीर केले.
येथील ग्रामपंचायतीच्या एकूण सदस्यांची संख्या अकरा आहे. त्यापैकी अनिता तोंडे यांना सहा मते तर शितल मल्हारी हंडाळ यांना पाच मते मिळाली. त्यामुळे फक्त एका मताने अनिता तोंडे या अतिशय चुरशीच्या निवडणुकीत विजयी झाल्या आहेत.
सरपंच बाळासाहेब रासकर यांनी राजीनामा दिल्याने रिक्त झालेल्या जागेसाठी निवडणूक घेण्यात आली होती.
निवडणूकी दरम्यान, अनिता तोंडे, शितल हंडाळ व अमृता हरिहर यांनी सरपंचपदासाठी उमेदवारी अर्ज दाखल केले होते. दरम्यान अमृता हरिहर यांनी अर्ज मागे घेतल्याने तोंडे आणि हंडाळ यांच्यात चुरशीची दुरंगी लढत झाली. अनिता तोंडे यांच्या गटाकडे अवघी पाच मते होती तर सत्ताधारी शितल हंडाळ गटाकडे सहा मते होती. त्यामुळे हंडाळ गटाचा विजय निश्चित मनला जात होता. तसेच गुलाल आपलाच याची हंडाळ गटाला शेवटपर्यंत खात्री होती.
अखेर गुप्त मतदान पद्धतीमुळे नाट्यमय घडामोडी होऊन बाजी पालटली आणि सरपंच निवडणुकीत गुप्त मतदानाद्वारे तोंडे यांना सहा मते मिळाली तर हंडाळ यांना पाच मते मिळाली. एक मत फुटल्याने हंडाळ यांचे सरपंच होण्याचे स्वप्न अपूर्ण राहिले व अनिता तोंडे या विजयी होऊन सरपंच झाल्या. नेमके फुटलेले एक मत कोणाचे? हे गुलदस्त्यात राहिल्यामुळे ग्रामस्थ व सदस्य चक्रावले आहेत.
नवनिर्वाचित सरपंच अनिता तोंडे यांचा ग्रामदैवत भैरवनाथ मंदिरात माजी सरपंच सतिष आरवडे व मान्यवरांच्या हस्ते सत्कार करण्यात आला. सहाय्यक निवडणूक निर्णय अधिकारी म्हणून ग्रामसेवक दिपाली झाडगे यांनी काम पाहिले.
