पोपट पाचंगे
रांजणगाव गणपती: आज संकष्टी चतुर्थी निमित्त पहाटे 5 वाजता श्रींचा अभिषेक करून मंदिर भाविकांसाठी खुले करण्यात आले. तसेच आज संकष्टी चतुर्थीनिमित्त देवस्थान ट्रस्टच्या वतीने आयोजित सामूहिक अथर्वशीर्ष पठण कार्यक्रमात महिलांसह भाविक मोठ्या संख्येने सहभागी झाले होते. सध्या उन्हाची तीव्रता अधिक असल्यामुळे आणि शाळांच्या परिक्षा सुरु असल्यामुळे दिवसभर भाविकांची गर्दी तुलनेने कमी दिसत होती.
संकष्टी चतुर्थी निमित्त देवस्थान ट्रस्टच्या वतीने भाविकांसाठी सुलभ दर्शन व्यवस्था, खिचडी प्रसाद, पिण्याचे पाणी व उन्हाचे प्रमाण जास्त असल्यामुळे भाविकांच्या सोयीसाठी शेडनेट बांधून सावली करण्यात आली होती. इत्यादी सुविधा देवस्थान ट्रस्ट तर्फे देण्यात आल्या अशी माहिती देवस्थान ट्रस्टच्या अध्यक्षा स्वाती पाचुंदकर यांनी सांगितले.
संकष्टी चतुर्थी निमित्त दुपारी 12 वाजता महापूजा व महानैवेद्य करण्यात आला. गणेशभक्त तथा येथील प्रगतशील शेतकरी नानासाहेब दिनकरराव पाचुंदकर यांच्या वतीने मंदिर गाभाऱ्यात विविध रंगी फुलांची आकर्षक सजावट करण्यात आली. दुपारी श्री महागणपती भजनी मंडळ, रांजणगाव गणपती यांचा भजनाचा कार्यक्रम झाला.
यावेळी देवस्थानचे मुख्य विश्वस्त डॉ.ओमकार देव, अध्यक्षा स्वाती पाचुंदकर, उपाध्यक्ष संदिप दौंडकर, सचिव डॉ.तुषार पाचुंदकर, खजिनदार विजय देव, राजमुद्रा पतसंस्थेचे अध्यक्ष दत्तात्रय पाचुंदकर, देवस्थान कर्मचारी व भाविक उपस्थित होते.
दरम्यान, रांजणगाव एमआयडीसी पोलिस ठाण्याचे पोलिस निरीक्षक महादेव वाघमोडे यांच्या नेतृत्वाखाली चोख पोलिस बंदोबस्त ठेवण्यात आला होता.
