लोणी काळभोर : अटकपूर्व जामीन अर्जात मदत करण्यासह गुन्ह्याचे दोषारोपपत्र लवकर दाखल करण्यासाठी लाच मागितल्याच्या आरोपावरून लोणी काळभोर पोलीस ठाण्यातील सहाय्यक पोलीस निरीक्षक कृष्णा जनार्दन बाबर यांना पुणे लाचलुचपत प्रतिबंधक विभागाने कारवाई करत पकडले होते. या प्रकरणानंतर आता बाबर यांच्याशी संबंधित असल्याचा दावा केली जाणारी एक कथित ऑडिओ क्लिप सोशल मीडियावर व्हायरल होत आहे. या ऑडिओमध्ये पाच लाख रुपयांच्या व्यवहाराचा उल्लेख असल्याचा दावा केला जात असून, त्यामुळे या प्रकरणाची चर्चा आणखी रंगली आहे. मात्र, या ऑडिओ क्लिपची स्वतंत्रपणे पुष्टी झालेली नाही.
कृष्णा बाबर (वय ४५) हे लोणी काळभोर पोलीस ठाण्यात सहाय्यक पोलीस निरीक्षक म्हणून कार्यरत होते. एका ५७ वर्षीय व्यक्तीने पुणे एसीबीकडे केलेल्या तक्रारीनंतर या प्रकरणाची पडताळणी करण्यात आली. तक्रारदार आणि त्यांच्या मुलाविरुद्ध लोणी काळभोर पोलीस ठाण्यात गुन्हा दाखल असून, त्याचा तपास बाबर यांच्याकडे होता. या गुन्ह्याचे दोषारोपपत्र लवकर न्यायालयात दाखल करण्यासाठी तसेच तक्रारदाराच्या मुलाच्या उच्च न्यायालयातील अटकपूर्व जामीन अर्जात मदत करण्यासाठी पैशांची मागणी केल्याचा आरोप बाबर यांच्यावर आहे.
एसीबीच्या पडताळणीत ५० हजार रुपयांची लाच स्वीकारण्याची तयारी असल्याचे निष्पन्न झाल्यानंतर हडपसर परिसरातील १५ चौकाजवळ सापळा रचण्यात आला. तक्रारदाराकडून कारमध्ये ५० हजार रुपये स्वीकारताना बाबर यांना रंगेहाथ पकडण्यात आले. याप्रकरणी हडपसर पोलीस ठाण्यात भ्रष्टाचार प्रतिबंधक अधिनियम १९८८ मधील कलम ७ अंतर्गत गुन्हा दाखल करण्यात आला आहे.
View this post on Instagram
ही कारवाई पोलीस अधीक्षक शिरीष सरदेशपांडे, अपर पोलीस अधीक्षक अजित पाटील, पोलीस उपअधीक्षक सतिश वाळके, पोलीस निरीक्षक सुहास हट्टेकर, पोलीस हवालदार दीपक काकडे, पोलीस अंमलदार भूषण ठाकूर, वैशाली माकर आणि त्यांच्या सहकाऱ्यांनी केली. दरम्यान, कथित ऑडिओ क्लिप व्हायरल झाल्याने या प्रकरणातील व्यवहारांबाबत नव्या चर्चांना सुरुवात झाली आहे. ऑडिओची सत्यता आणि त्यातील दाव्यांची अधिकृत पडताळणी होणे महत्त्वाचे ठरणार आहे.
