पुणे, ता. 8 : खराडीतील सिटी व्हिस्टा बिल्डिंगमधील ‘फिल टच स्पा’वर खराडी पोलिसांनी सापळा रचून छापा 4 सप्टेंबरला टाकला. या छाप्यात पोलिसांनी एका महिलेची सुटका केली आहे. तर वेश्याव्यवसाय करून घेणाऱ्या दोन महिलांवर अनैतिक मानवी वाहतूक प्रतिबंध कायद्यान्वये गुन्हा दाखल केला आहे.
राधिका हरीप्रसाद शर्मा (वय 38) व मनिषा विद्यानंद शिंदे (वय 54) असे गुन्हा दाखल करण्यात आलेल्यांची नावे आहेत. या प्रकरणी सहायक पोलीस निरीक्षक मिरा लक्ष्मण चव्हाण यांनी सरकारच्या वतीने खराडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, खराडी पोलिसांना स्पाच्या नावाखाली वेश्याव्यवसाय सुरू असल्याची गोपनीय माहिती मिळाली होती. त्यानंतर वरिष्ठ पोलीस निरीक्षक संजय चव्हाण यांच्या मार्गदर्शनाखाली सापळा रचण्यात आला.
बनावट ग्राहकाच्या माध्यमातून व्यवहाराची खातरजमा करून पोलिसांनी सायंकाळी साडेपाच ते पावणेसातच्या सुमारास छापा टाकला. बनावट ग्राहकाकडून 4 हजार रुपये घेतल्याचा पोलिसांचा दावा आहे. त्यानंतर पोलिसांनी स्पाच्या कॅश काउंटरची पाहणी केली असता, सापळ्यापूर्वी दिलेल्या नोटांच्या क्रमांकांशी जुळणाऱ्या 500 रुपयांच्या आठ नोटा मिळून आल्या. तसेच काउंटरमधून आणखी 18 हजार 500 रुपये रोख जप्त करण्यात आले.
या छाप्यादरम्यान एका मसाज रूममध्ये महिला आढळून आली. पोलिसांनी तिची सुटका करून तिला सुरक्षिततेसाठी ताब्यात घेतले. मसाजसाठी 1500 रुपये आणि अतिरिक्त सेवेसाठी 2 हजार ते 2 हजार 500 रुपये आकारले जात असल्याचे समोर आहे. स्पा मॅनेजर राधिका शर्मा हिच्याकडून वेश्याव्यवसाय करवून घेतला जात असल्याचा आरोप पोलिसांनी केला आहे. तसेच, जागा मालकाच्या प्रतिनिधीने जागा उपलब्ध करून दिल्याचा आरोप करत मनिषा शिंदे यांनाही गुन्ह्यात आरोपी करण्यात आले आहे.
या कारवाईत पोलिसांनी रोख रक्कम, दोन मोबाईल, पेटीएम मशीन, सीसीटीव्ही डीव्हीआर, रेट कार्ड आणि कंडोमचे पाकीट असा एकूण 74 हजार रुपयांचा मुद्देमाल जप्त केला आहे. कारवाईचे व्हिडीओ चित्रीकरण ई-साक्ष ॲपद्वारे करण्यात आल्याचेही तक्रारीत नमूद आहे. खराडी पोलिस ठाण्यात राधिका शर्मा व मनिषा शिंदे यांच्याविरुद्ध अनैतिक मानवी वाहतूक प्रतिबंध कायदा 1956 चे कलम 3, 4, 5 तसेच भारतीय न्याय संहितेचे कलम 143, 3(5) अन्वये गुन्हा दाखल करण्यात आला आहे. पुढील तपास पोलिस करीत आहेत.
