पुणे: राधा पाटील यांच्याविरोधात गुन्हा दाखल झाल्यानंतर त्यांनी या प्रकरणावर संतप्त प्रतिक्रिया व्यक्त केली आहे. आपल्या वेशभूषेला आणि हावभावांना अश्लील ठरवले जात असल्याबद्दल त्यांनी प्रश्न उपस्थित केला. साडी नेसल्यावर कंबर दिसणे ही स्वाभाविक बाब असून, त्यामध्ये अश्लीलता काय, असा सवाल त्यांनी केला.
आपले हावभाव कधीही अश्लील नसल्याचे सांगत राधा पाटील यांनी आपल्यावरील आरोप फेटाळून लावले. आपला अश्लील हावभाव असलेला कोणताही व्हिडिओ दाखवावा, असे आव्हानही त्यांनी दिले. त्यामुळे आपल्याविरोधात करण्यात आलेली कारवाई नेमकी कोणत्या आधारावर आहे, असा प्रश्न त्यांनी उपस्थित केला.
दरम्यान, आपल्या आडनावामुळे आपल्याला लक्ष्य केले जात असल्याचा आरोपही राधा पाटील यांनी केला. केवळ ‘पाटील’ आडनाव असल्यामुळे आपल्याकडे वेगळ्या नजरेने पाहिले जात आहे का, असा सवाल त्यांनी उपस्थित केला. एखाद्या व्यक्तीने चुकीचे कृत्य केले म्हणून त्याच आडनावाच्या इतर व्यक्तीलाही त्याच नजरेने पाहणे योग्य आहे का, असा प्रश्न त्यांनी केला.
गुन्हा दाखल झाल्यानंतर राधा पाटील यांनी दिलेली ही प्रतिक्रिया सध्या चर्चेचा विषय ठरत आहे. आपल्या वेशभूषा, हावभाव आणि आडनावावरून आपल्याला लक्ष्य केले जात असल्याचा त्यांचा दावा असून, या प्रकरणाबाबत त्यांनी नाराजी व्यक्त केली आहे. आता या प्रकरणातील पुढील तपासात नेमकी कोणती माहिती समोर येते, याकडे लक्ष लागले आहे.
