पुणे : दक्षिण पुण्यातील वाहतूक कोंडी कमी करण्यासाठी महत्त्वाच्या ठरणाऱ्या स्वारगेट-कात्रज मेट्रो मार्गिकेच्या कामाला लवकरच वेग येणार आहे. डिसेंबर 2030 पर्यंत स्वारगेट ते कात्रजदरम्यान मेट्रो सेवा सुरू करण्याचे लक्ष्य महामेट्रोने ठेवले आहे. या मार्गामुळे दक्षिण पुण्यातील नागरिकांना मोठा दिलासा मिळण्याची अपेक्षा आहे.
स्वारगेट ते कात्रज हा 5.46 किलोमीटर लांबीचा संपूर्ण भुयारी मेट्रो मार्ग असणार आहे. या मार्गावर मार्केट यार्ड, बिबवेवाडी, पद्मावती, बालाजीनगर आणि कात्रज अशी पाच स्थानके उभारण्यात येणार आहेत. भुयारी मार्गाचे खोदकाम करण्यासाठी चार टनेल बोरिंग मशीनचा वापर केला जाणार आहे. त्यापैकी दोन अत्याधुनिक यंत्रे लवकरच पुण्यात दाखल होणार असून, त्यांची जोडणी आणि चाचण्या पूर्ण झाल्यानंतर खोदकामाला सुरुवात होईल.
महामेट्रोचे व्यवस्थापकीय संचालक श्रावण हर्डीकर यांच्या माहितीनुसार, एका यंत्राद्वारे दररोज सुमारे 10 मीटर बोगदा खोदण्याचे नियोजन आहे. मेट्रोची कामे लवकर पूर्ण करण्यासाठी स्थानकांचे बांधकामही टप्प्याटप्प्याने न करता शक्य तितक्या प्रमाणात एकाच वेळी सुरू ठेवले जाणार आहे. कात्रज ते शनिवारवाडा परिसरातील जुन्या भुयारी दगडी जलवाहिन्यांमुळे या प्रकल्पाच्या कामात अडथळा येणार नसल्याचेही त्यांनी स्पष्ट केले.
दरम्यान, पिंपरी-चिंचवडमधील मेट्रो भक्ती-शक्ती आणि निगडीपर्यंत नेण्याचे कामही सुरू आहे. शिवाजीनगर स्थानकाचे काम पूर्ण झाल्यानंतर तिसऱ्या मेट्रो मार्गिकेच्या पुढील कामाला चालना दिली जाणार आहे. भविष्यात मेट्रोचे जाळे चाकण, कोंढवा, खडकवासला आणि प्रस्तावित पुरंदर विमानतळापर्यंत विस्तारण्याचे नियोजन आहे.
पुणे आणि परिसरातील मेट्रो नेटवर्क सुमारे 240 किलोमीटरपर्यंत नेण्याचे दीर्घकालीन उद्दिष्ट आहे. तसेच नागरिकांचा खासगी वाहनांवरील वापर कमी करण्यासाठी मेट्रो स्थानकांपर्यंत पोहोचण्यासाठी सामायिक रिक्षा सेवा सुरू करण्याबाबत रिक्षाचालक संघटनांशी चर्चा सुरू असल्याचे हर्डीकर यांनी सांगितले.
