उरुळी कांचन, (पुणे) : जेजुरी-उरुळी कांचन महामार्गावरील शिंदवणे घाटात टेम्पो व पिकअप यांच्यात समोरासमोर जोरदार धडक होऊन अपघात झाला. या अपघातात पिकअप रस्त्यावरच पलटी झाला. त्यात पिकअप चालक गंभीर जखमी झाला आहे. हा अपघात गुरुवारी (ता. १८) सायंकाळी साडेचार वाजण्याच्या सुमारास झाला.
अपघातग्रस्त पिकअप चालकाचे अद्याप समजू शकले नसून त्याला एका कारमधून उरुळी कांचन येथील एका खाजगी रुग्णालयात दाखल करण्यात आले आहे. मिळालेली माहितीनुसार, पिकअप हे उरुळी कांचन बाजूकडून पाईप घेऊन जेजुरीकडे निघाले होते. तर टेम्पो हा जेजुरीकडून उरुळी कांचनच्या बाजूकडे निघाला होता. घाटात आला असता पिकअप व टेम्पो यांच्यात समोरासमोर जोरदार धडक झाली. या धडकेत पिकअप रस्त्यावरच पलटी झाला. यावेळी अपघातग्रस्त पिकअप चालकाला रस्त्यावरून जाणाऱ्या नागरिकांच्या मदतीने बाहेर काढण्यात आले.
दरम्यान, या अपघातात त्याला गंभीर दुखापत झाली असून, रस्त्यावरून जाणाऱ्या एका कारमधून उरुळी कांचन येथील रुग्णालयात दाखल करण्यात आले. नागरिकांनी या अपघाताची माहिती उरुळी कांचन पोलिसांना दिली असून, पोलीस घटनास्थळी दाखल झाले आहेत.
