इंदापूर (पुणे) : करमाळा, हडपसर, इंदापूर पोलीस ठाण्याच्या हद्दीतील एस.टी. स्टँडवर बसमध्ये बसण्याच्या बहाण्याने गर्दीचा फायदा घेत प्रवाशांच्या बॅगेतील व गळ्यातील सोन्याचे दागिने व रक्कम चोरी करणाऱ्या सराईत महिलेला स्थानिक गुन्हे अन्वेषण व इंदापूर पोलिसांनी ताब्यात घेतले आहे.
अश्विनी अवि भोसले (वय २३, रा. माही जळगाव, ता. कर्जत, जि. अहमदनगर) असे ताब्यात घेण्यात आलेल्या महिलेचे नाव आहे. तिच्याकडून २३५ ग्रॅम सोन्याचे दागिने व रोख रक्कम असा एकूण ११ लाख ६४ हजार किमतीचा मुद्देमाल हस्तगत करण्यात आला आहे.
पोलिसांनी दिलेल्या माहितीनुसार, इंदापूर बसस्थानकातून पुण्यासाठी निघालेल्या अलका वसंतराव बनकर (वय ५९, रा. ताम्हाणेनगर, अकलूज, ता. माळशिरस, जि. सोलापूर) या एस.टी. बसमध्ये चढताना त्यांच्या बॅगेतील लहान पर्स कोणीतरी अज्ञात व्यक्तीने गर्दीचा फायदा घेवून चोरून नेली होती. यामध्ये साडे पंधरा तोळे वजनाचे सोन्याचे दागिने व रोख रक्कम असा एकूण ८ लाख ४ हजार रुपये किमतीचा मुद्देमाल चोरीला गेला होता. याबाबत इंदापूर पोलीस ठाण्यात गुन्हा दाखल करण्यात आला होता.
सदर गुन्हयाचा समांतर तपास स्थानिक गुन्हे शाखेच्या पथकामार्फत चालू असताना सीसीटीव्ही व गोपनीय बातमीदारामार्फत बातमी मिळाली की, सदरचा गुन्हा हा रेकॉर्डवरील महिला अश्विनी अवि भोसले हिने केला आहे. स्थानिक गुन्हे शाखेच्या पथकाला मिळालेल्या माहितीच्या अनुषंगाने महिला आरोपी ही कर्जत परिसरात आल्याची माहिती मिळाली.
गुरुवारी (ता. ७) स्थानिक गुन्हे शाखेचे पथक व इंदापूर पोलीसांचे पथकासह जावून सापळा रचून आरोपी महिला अश्विनी भोसले हिला ताब्यात घेतले. तिच्याकडे अधिक चौकशी केली असता खेड, इंदापूरसह परिसरात एकूण तीन गुन्हे केल्याची कबुली दिली आहे. नमूद गुन्हयांतील चोरी गेलेल्या सोन्याच्या दागिन्यांपैकी २३५ ग्रॅम वजनाचे सोन्याचे दागिने व रोख रक्कम असा एकूण ११ लाख ६४ हजार किमतीचा मुद्देमाल हस्तगत करण्यात आला आहे.
दरम्यान, आरोपी अश्विनी भोसलेंच्या विरोधात जामखेड, करमाळा, हडपसर, पिंपरी पोलीस स्टेशनला अशा प्रकारचे एकूण ५ गुन्हे दाखल आहेत. ही कामगिरी स्थानिक गुन्हे शाखेचे पोलीस निरीक्षक अविनाश शिळीमकर, इंदापूर पोलीस ठाण्याचे पोलीस निरीक्षक सुर्यकांत कोकणे, गुन्हे शाखेचे सहायक पोलीस निरीक्षक योगेश लंगुटे, कुलदीप संकपाळ, इंदापूर पोलीस ठाण्यातील पोलीस उपनिरीक्षक विवेकानंद राळेभात, पोलीस अंमलदार बाळासाहेब कारंडे, अभिजीत एकशिंगे, स्वप्निल अहीवळे, राजू मोमीण, अतुल डेरे, निलेश शिंदे, पोलीस अंमलदार प्रकाश माने, सलमान खान, नंदू जाधव, विशाल चौधर, गणेश डेरे, निलेश केमदारने, महिला पोलीस अंमलदार रेश्मा जगताप, वंदना भोंग यांनी केली आहे.
