लोणी काळभोर, (पुणे) : लोणी काळभोर पोलिसांनी तडीपार केलेल्या एका आरोपीला गुन्हे शाखा युनिट ६ च्या पोलिसांनी कदमवाकवस्ती (ता. हवेली) ग्रामपंचायत हद्दीतून गुरुवारी (ता. ८) ताब्यात घेतले आहे.
अभिजित गोपीचंद दरेकर (वय ३३, रा. सलोनी हाईट्स, संभाजीनगर, कदमवाकवस्ती, ता. हवेली) असे अटक करण्यात आलेल्या आरोपीचे नाव आहे. त्याला पुढील तपासासाठी लोणी काळभोर पोलिसांच्या ताब्यात देण्यात आले आहे.
गुन्हे शाखा युनिट ६ च्या पोलिसांनी दिलेल्या माहितीनुसार, लोणी काळभोर पोलीस ठाण्याच्या हद्दीत गुन्हे शाखा युनिट ६ चे पथक गस्त घालीत असताना, पोलीस अंमलदार ऋषीकेश व्यवहारे यांना गुप्त बातमीदारमार्फत माहिती मिळाली की, लोणी काळभोर पोलीस स्टेशनकडील तडीपार आरोपी संभाजीनगर येथे हायस्कूलजवळ मोकळ्या मैदानात थांबला आहे.
मिळालेली माहिती वरिष्ठ पोलीस निरीक्षक उल्हास कदम यांना कळवून त्यांनी दिलेल्या आदेशानुसार पोलीस पथकासह संबंधित ठिकाणी पोहोचले. या वेळी पथकाने आरोपी दरेकर याला राहत्या घराजवळून शिताफीने ताब्यात घेतले.
दरम्यान, आरोपी दरेकर याच्यावर लोणी काळभोर पोलीस ठाण्यात विविध गुन्हे दाखल आहेत. त्याची वैद्यकीय तपासणी करुन पुढील तपास कामी लोणी काळभोर पोलिसांच्या ताब्यात देण्यात आले आहे. तसेच लोणी काळभोर पोलीस ठाण्याच्या हद्दीतील २०२३ साली ११ गुन्हेगार तडीपार करण्यात आले असून ५ गुन्हेगारांवर एमपीडीए कायद्यानुसार कारवाई करण्यात आलेली आहे.
ही कामगिरी वरीष्ठ पोलीस निरीक्षक उल्हास कदम, पोलीस नाईक प्रतिक लाहीगुडे, पोलीस अंमलदार ऋषीकेश व्यवहारे, नितीन धाडगे यांच्या पथकाने केली आहे.
