बारामती, (पुणे) : बारामती विधानसभा पोटनिवडणुकीच्या पार्श्वभूमीवर निवडणूक प्रशासनाने सर्व तयारी पूर्ण केली असून मतदान प्रक्रिया सुरळीत पार पडण्यासाठी यंत्रणा सज्ज झाली आहे. आवश्यक मतदान साहित्य आणि कर्मचारी आज संबंधित मतदान केंद्रांकडे रवाना करण्यात आले. एमआयडीसी परिसरातील महाराष्ट्र राज्य वखार महामंडळाच्या गोदामातून ही वितरण प्रक्रिया पार पडली.
दरम्यान, काटेवाडी येथील जिल्हा परिषद शाळेत राज्याच्या उपमुख्यमंत्री सुनेत्रा अजित पवार यांनी सकाळी आपला मतदानाचा हक्क बजावला. यावेळी खासदार पार्थ अजित पवार आणि जय अजित पवार यांनीही मतदान करून लोकशाही प्रक्रियेत सहभाग नोंदवला. नागरिकांनी जबाबदारीची जाणीव ठेवून मोठ्या संख्येने मतदान करावे, असे आवाहन त्यांनी केले.
तसेच खासदार सुप्रिया सुळे यांनी कुटुंबासह मतदान केले. कर्तव्य बजावताना दिवंगत दादांना आदरांजली अर्पण करण्यासाठी नागरिकांनी मोठ्या संख्येने मतदानासाठी पुढे यावे, असे आवाहन त्यांनी यावेळी केले.
या निवडणुकीसाठी ४७८ मतदान केंद्रांवर ४७८ ईव्हीएम, ९५६ बॅलेट युनिट्स आणि ४७८ व्हीव्हीपॅट यंत्रांची व्यवस्था करण्यात आली आहे. ही यंत्रे ६० बंदिस्त मिनी टेम्पोंद्वारे क्षेत्रीय अधिकाऱ्यांच्या देखरेखीखाली सुरक्षितपणे मतदान केंद्रांवर पोहोचवण्यात आली.
निवडणूक आयोगाच्या मार्गदर्शक सूचनांनुसार यंदा वितरण प्रक्रियेत बदल करण्यात आला असून मतदान पथकांना डिस्पॅच सेंटरवर न बोलावता थेट मतदान केंद्रांवर जाण्याच्या सूचना देण्यात आल्या आहेत. ईव्हीएमसह आवश्यक फॉर्म्स, लिफाफे आणि इतर साहित्य थेट केंद्रांवर पोहोचवण्यात येत असल्याची माहिती तहसीलदार तथा सहायक निवडणूक निर्णय अधिकारी स्वप्नील रावडे यांनी दिली.
