पुणे: थेरगावमधील जगतापनगर येथे प्रेमसंबंधातून मानसिक त्रासाला कंटाळून एका व्यक्तीने आत्महत्या केल्याची घटना समोर आली आहे. विशेष म्हणजे आत्महत्येनंतर पुरावा नष्ट करण्याच्या उद्देशाने संबंधित नातेवाईक महिलेनं तिच्या प्रियकराच्या मदतीने मृतदेह दूर नेऊन फेकून दिला. या प्रकरणी पोलिसांनी महिलेवर आणि तिच्या प्रियकरावर गुन्हा दाखल करून दोघांना अटक केली आहे.
तय्युबशहा उस्मानशहा (वय ४६, रा. जगतापनगर, थेरगाव, मूळ गाव बुलढाणा) असे आत्महत्या केलेल्या व्यक्तीचे नाव आहे. याबाबत तय्युब यांचा मुलगा तोसीफ तय्युब शहा (वय १८) याने काळेवाडी पोलिस ठाण्यात फिर्याद दिली आहे.
पोलिसांनी ३२ वर्षीय नातेवाईक महिलेसह तिचा प्रियकर साहिल कैलास घाडगे (वय २१) या दोघांना अटक केली आहे. तसेच एका अल्पवयीन मुलाच्या विरोधातही गुन्हा दाखल करण्यात आला आहे.
फिर्यादी तोसीफ याच्या माहितीनुसार, त्याच्या वडिलांची ओळखीतील संबंधित महिलेला साहिल नावाच्या तरुणाशी प्रेमसंबंध होते. तय्युब हे गावी राहत होते, परंतु अधूनमधून थेरगाव येथे येत असत. ते येथे आले की, संबंधित महिला त्यांच्याशी सतत वाद करत असे आणि त्यांना मानसिक त्रास द्यायची.
या त्रासाला कंटाळून १४ जून रोजी रात्री साडेनऊच्या सुमारास तय्युब यांनी साहिल याच्या घरात गळफास घेऊन आत्महत्या केली. या घटनेनंतर घडलेला प्रकार लपवण्यासाठी आणि पुरावा नष्ट करण्याच्या उद्देशाने संबंधित महिलेनं साहिलला सांगितले. त्यानुसार साहिल याने एका अल्पवयीन मुलाच्या मदतीने तय्युब यांचा मृतदेह मावळ तालुक्यातील दारूंब्रे गावाच्या हद्दीत नेऊन फेकून दिला.
मात्र, मृतदेहाजवळ सापडलेल्या कागदपत्रांमुळे तय्युब यांची ओळख पटली आणि तपासाच्या पुढील टप्प्यात खरा प्रकार उघडकीस आला. सध्या काळेवाडी पोलीस ठाण्याचे पथक या प्रकरणाचा अधिक तपास करीत आहे.
