पुणे: पोलीस हे नागरिकांच्या रक्षणासाठी असतात, मात्र हेच पोलीस जर भक्षक बनले, तर काय? असाच एक धक्कादायक प्रकार समोर आल्याने पोलीस खात्यात खळबळ उडाली आहे. नागरिकांना मदतीसाठी तत्काळ पोहोचता यावे, यासाठी प्रत्येक पोलीस ठाण्याला मोबाईल व्हॅन उपलब्ध करून देण्यात आली आहे. या मोबाईल पथकाने परिसरात गस्त घालून गुन्हे प्रतिबंध करणे अपेक्षित असते. मात्र, याच मोबाईल व्हॅनवर नेमलेले दोन पोलीस अंमलदारच नागरिकांना अटक करण्याची धमकी देऊन खोट्या तक्रारीच्या नावाखाली खंडणी वसूल करत असल्याचा धक्कादायक प्रकार उघडकीस आला आहे.
ही बाब समोर आल्यानंतर पोलीस उपायुक्त निखिल पिंगळे यांनी तात्काळ कारवाई करत डेक्कन पोलीस ठाण्यातील दोन पोलीस अंमलदारांना निलंबित केले आहे. निलंबित पोलिसांची नावे गणेश दादासाहेब देसाई आणि योगेश नारायण सुतार अशी आहेत. पोलिस अंमलदार गणेश देसाई याला १७ जून रोजी रात्रपाळीसाठी मोबाईल क्रमांक वाहन चालक म्हणून तर योगेश सुतार याला बालगंधर्व परिसरात भेट मार्शल म्हणून नेमणूक देण्यात आली होती.
घटनेनुसार, डेक्कन पोलीस ठाण्यात एक तक्रार दाखल झाली होती. फिर्यादीनुसार, लॉ कॉलेज रोडवरील दामले पथ येथे एका युवक-युवतीने आपली कार पार्क करून रात्री थांबले होते. त्या वेळी दोन पोलीस अंमलदार घटनास्थळी आले. त्यांनी या भागातून तक्रार आली असल्याचे सांगून त्या दोघांना अटक करण्याची धमकी दिली आणि २०,००० रुपये मागितले. “इतके पैसे का?” असे विचारताच, पोलिसांनी त्यांना चौकशीसाठी पोलीस चौकीत नेण्याची धमकी दिली. चौकीत जाऊन बदनामी होईल या भीतीने संबंधित युवक-युवतीने पैसे देण्याचे मान्य केले.
यानंतर, गणेश देसाई यांच्या दुचाकीवर मागे बसून संबंधित युवक कमला नेहरू पार्कमधील एटीएममध्ये गेला आणि तिथून २०,००० रुपये काढून पोलिसांना दिले. कायद्याच्या उल्लंघनासाठी चौकशी करायची असेल, तर पोलीस ठाण्यात नेऊन कायदेशीर कार्यवाही करणे आवश्यक असते. मात्र, या दोघांनी कोणतीही अधिकृत प्रक्रिया न करता त्यांना सोडून दिले. कर्तव्यात कसूर करत त्यांनी बेजबाबदारपणाचे वर्तन केले आणि पोलीस खात्याची प्रतिमा मलीन केली. त्यामुळे पोलिस उपायुक्त निखिल पिंगळे यांनी दोन्ही अंमलदारांना निलंबित केल्याची माहिती सूत्रांकडून मिळाली आहे.
