दौंड: पुणे जिल्ह्यातील दौंड तालुक्यात महावितरणच्या वीज तपासणी मोहिमेदरम्यान वीजचोरीचा प्रकार समोर आला आहे. गाडेवाडी येथे एका घरात एलटी लाईनवरून थेट केबल टाकून वीज वापरली जात असल्याचे महावितरणच्या पथकाला आढळून आले. या प्रकरणी संदीप वामन लगड यांच्याविरोधात दौंड पोलीस ठाण्यात गुन्हा दाखल करण्यात आला आहे.
महावितरणचे सहाय्यक अभियंता उमर हारून शेख यांनी याबाबत फिर्याद दिली आहे. त्यांच्या फिर्यादीनुसार, २४ ऑगस्ट रोजी दुपारी उमर शेख हे मुख्य तंत्रज्ञ मधुकर लगड, वरिष्ठ तंत्रज्ञ दादासाहेब मेंगावडे आणि विद्युत सहाय्यक अर्चना बांडाबुच्चे यांच्यासोबत दौंड ग्रामीण हद्दीतील गाडेवाडी येथे वीज जोडण्यांची तपासणी करण्यासाठी गेले होते.
तपासणीदरम्यान संदीप वामन लगड यांच्या घराजवळील एलटी लाईनच्या पोलवरून केबलचा आकडा टाकण्यात आल्याचे पथकाला दिसले. काळ्या रंगाची वायर थेट घरामध्ये जोडल्याचेही आढळून आले. पथकाने घरातील वीज वापराची तपासणी केली असता १.८६ किलोवॅटचा लोड आढळला.
महावितरणच्या अधिकाऱ्यांनी दोन पंचांच्या उपस्थितीत घटनास्थळाचा पंचनामा केला. हा पंचनामा दुपारी ४ वाजून १० मिनिटांनी सुरू करून ५ वाजता पूर्ण करण्यात आला. तपासणी अहवालानुसार, संबंधित घरात मागील १२ महिन्यांपासून वीजचोरी होत असल्याचे नमूद करण्यात आले आहे.
या काळात एकूण १,८६६ युनिट वीज चोरी झाल्याचे तपासणीत निष्पन्न झाले. चोरी झालेल्या विजेची किंमत ३६ हजार ८२० रुपये असल्याचे महावितरणच्या अहवालात नमूद आहे. वीजचोरीसाठी वापरण्यात आलेली अंदाजे २० फूट लांबीची काळ्या रंगाची केबलही पंचनाम्याद्वारे जप्त करण्यात आली आहे.
या प्रकरणी संदीप वामन लगड यांच्याविरोधात भारतीय विद्युत अधिनियम २००३ मधील कलम १३५ अंतर्गत दौंड पोलीस ठाण्यात गुन्हा दाखल करण्यात आला आहे. फिर्यादीनुसार, महावितरणच्या एलटी लाईनवरून थेट केबल टाकून कंपनीची वीज अनधिकृतपणे वापरण्यात आल्याचा आरोप आहे.
दौंड पोलीस ठाण्यात २ सप्टेंबर २०२६ रोजी रात्री ८ वाजून ४९ मिनिटांनी एफआयआर नोंदवण्यात आला. या प्रकरणाचा पुढील तपास पोलीस करत आहेत.
