दौंड : दौंड शहरात काही दिवसांपूर्वी गाजलेल्या कथित ‘लव्ह जिहाद’ प्रकरणातील फरार आरोपीने चक्क दौंड नगरपालिकेत हजेरी लावून राष्ट्रवादी काँग्रेसच्या (अजित पवार गट) गटनेत्याच्या दालनात चहापान केल्याचा प्रकार समोर आला आहे. २ सप्टेंबर रोजी घडलेल्या या घटनेचे सीसीटीव्ही फुटेज समोर आल्याने दौंड शहरासह राजकीय वर्तुळात खळबळ उडाली आहे.
सीसीटीव्ही फुटेजमुळे प्रकार समोर
मिळालेल्या माहितीनुसार, संबंधित प्रकरणात आरोपीविरोधात गुन्हा दाखल असून पोलीस त्याचा शोध घेत आहेत. मात्र, पोलिसांच्या शोधात असलेला हा आरोपी थेट दौंड नगरपालिकेतील राष्ट्रवादी काँग्रेसच्या (अजित पवार गट) गटनेत्याच्या दालनात आल्याचे सीसीटीव्ही फुटेजमधून दिसून येत आहे. फुटेजमध्ये संबंधित आरोपी दालनात चहा घेताना दिसत असून, त्यावेळी राष्ट्रवादीचे गटनेते, पक्षाचे काही पदाधिकारी तसेच काही नगरसेविकांचे पती उपस्थित असल्याचे दिसत असल्याचा दावा करण्यात येत आहे.
पोलिसांच्या शोधात असलेला आरोपी थेट पालिकेच्या कार्यालयात पोहोचतोच कसा, असा सवाल नागरिकांकडून उपस्थित केला जात आहे. फरार आरोपीला पालिकेच्या दालनात प्रवेश कसा मिळाला आणि या भेटीदरम्यान नेमकी काय चर्चा झाली, याबाबतही आता चर्चा सुरू झाली आहे.
सीसीटीव्ही फुटेज समोर आल्यानंतर विविध सामाजिक आणि हिंदुत्ववादी संघटनांनी या प्रकारावर आक्षेप घेतला आहे. फरार आरोपीशी पालिका दालनात चर्चा करणाऱ्या किंवा त्याला कोणत्याही प्रकारे सहकार्य करणाऱ्या व्यक्तींची चौकशी करून, दोष आढळल्यास संबंधितांवर कायदेशीर कारवाई करावी, अशी मागणी करण्यात येत आहे.
दरम्यान, या संपूर्ण प्रकाराची दौंड पोलिसांकडून प्राथमिक माहिती घेण्यात येत असून, सीसीटीव्ही फुटेज आणि संबंधित व्यक्तींच्या भूमिकेबाबत तपास प्रक्रिया सुरू आहे. या प्रकरणात नेमके काय समोर येते आणि फरार आरोपी पालिका कार्यालयात कोणाच्या माध्यमातून आला, याकडे आता दौंडकरांचे लक्ष लागले आहे.
