बारामती : शेतीमध्ये नवनवीन प्रयोग आणि आधुनिक तंत्रज्ञानाचा वापर करण्यावर ज्येष्ठ नेते शरद पवार यांचा नेहमीच भर राहिला आहे. याच पार्श्वभूमीवर गोविंद बाग येथे त्यांच्या उपस्थितीत ‘शरद मॅंगो’ या आंब्याच्या विशिष्ट वाणाच्या रोपांची लागवड करण्यात आली. यावेळी गोविंद बागेत आधुनिक तंत्रज्ञानाच्या मदतीने घेण्यात आलेल्या ऊस पिकाचीही शरद पवार यांनी पाहणी केली.
‘शरद मॅंगो’ हे आंब्याचे वाण सोलापूर जिल्ह्यातील माढा तालुक्यातील अरण येथील शेतकरी दत्तात्रय घाडगे यांनी विकसित केले आहे. या वाणाचे वैशिष्ट्य म्हणजे त्याच्या एका आंब्याचे वजन साधारण तीन किलोपर्यंत असते. शेतकऱ्यांच्या प्रयोगशीलतेतून आणि सातत्यपूर्ण मेहनतीतून अशा प्रकारची नवीन वाणे विकसित होत असल्याने या प्रयोगाकडे शेती क्षेत्राचे लक्ष लागले आहे.
गोविंद बाग येथे या वाणाच्या रोपांची लागवड करताना शरद पवार यांनी त्याची माहिती जाणून घेतली. शेतकऱ्यांनी पारंपरिक पद्धतींसोबत नवीन तंत्रज्ञान आणि प्रयोगशीलतेचा स्वीकार केल्यास शेतीमध्ये उत्पादनवाढीसाठी नवे मार्ग उपलब्ध होऊ शकतात, असे या उपक्रमातून अधोरेखित झाले.
दरम्यान, गोविंद बागेतील ऊस पिकाचीही शरद पवार यांनी पाहणी केली. या पिकासाठी AI म्हणजेच कृत्रिम बुद्धिमत्ता तंत्रज्ञानाचा वापर करण्यात आला आहे. पिकाची स्थिती, उत्पादनक्षमता आणि शेती व्यवस्थापन अधिक प्रभावी करण्यासाठी आधुनिक तंत्रज्ञानाचा वापर करण्याच्या दृष्टीने हा प्रयोग करण्यात येत आहे.
बदलत्या काळानुसार शेती अधिक आधुनिक आणि तंत्रज्ञानाधिष्ठित करण्याची गरज वाढत आहे. कमी खर्चात अधिक उत्पादन घेण्यासाठी तसेच शेतीतील विविध अडचणींवर तंत्रज्ञानाच्या माध्यमातून उपाय शोधण्यासाठी अशा प्रयोगांना महत्त्व आहे. नवीन वाणांना प्रोत्साहन देण्यासोबतच आधुनिक तंत्रज्ञानाचा शेतीत वापर वाढविण्याच्या दृष्टीने गोविंद बागेतील हे प्रयोग महत्त्वाचे ठरत आहेत.
