पुणे : वडिलोपार्जित जमिनीच्या प्रकरणातील आदेश लवकर मिळवून देण्यासाठी 25 हजार रुपयांची लाच मागणाऱ्या पुरंदर तहसील कार्यालयातील क्लार्कला लाचलुचपत प्रतिबंधक विभागाच्या पुणे युनिटने रंगेहाथ पकडले. विजय मल्हारी खळदकर (वय 57, रा. कुंभारवळण, ता. पुरंदर) असे ताब्यात घेण्यात आलेल्या व्यक्तीचे नाव आहे.
तक्रारदाराच्या वडिलोपार्जित जमिनीच्या असमान हिस्स्याबाबतचे प्रकरण तहसीलदार, पुरंदर यांच्या न्यायालयात सुरू होते. 24 जून रोजी या प्रकरणाची सुनावणी पूर्ण करण्यात आली होती. दोन्ही बाजूंना आपली बाजू मांडण्याची संधी देण्यात आली होती. मात्र, संबंधित आदेश अद्याप देण्यात आलेला नव्हता.
या आदेशाबाबत विचारणा करण्यासाठी तक्रारदार 29 ऑगस्ट रोजी पुरंदर तहसील कार्यालयात गेले होते. त्यावेळी त्यांची भेट क्लार्क विजय खळदकर यांच्याशी झाली. तक्रारदाराच्या म्हणण्यानुसार, प्रकरण तहसीलदारांसमोर ठेवण्यासाठी सुरुवातीला पाच हजार रुपयांची मागणी करण्यात आली. त्यानंतर तक्रारदाराने लाचलुचपत प्रतिबंधक विभागाकडे तक्रार दाखल केली.
तक्रारीची पडताळणी 2 सप्टेंबर रोजी करण्यात आली. त्यावेळी संबंधित प्रकरणाचा आदेश तहसीलदारांकडून मिळवून देण्यासाठी खळदकर यांनी 25 हजार रुपयांची लाच मागितल्याचे निष्पन्न झाले. त्यानंतर एसीबीच्या पुणे युनिटने सापळा रचला. पंचांसमक्ष 25 हजार रुपयांची लाच स्वीकारताना खळदकर यांना तहसील कार्यालयासमोरील रोहित हॉटेलजवळ, सासवड येथे रंगेहाथ पकडण्यात आले.
या कारवाईचे नेतृत्व लाचलुचपत प्रतिबंधक विभागाचे पोलीस निरीक्षक अविनाश घरबुडे यांनी केले. पोलीस उपअधीक्षक सतीश वाळके यांच्या पर्यवेक्षणाखाली ही कारवाई करण्यात आली. सापळा पथकात पोलीस हवालदार बाळासाहेब गदादे, पोलीस हवालदार दीपक काकडे आणि पोलीस कॉन्स्टेबल रवी दिवेकर यांचा समावेश होता. हे तिघेही लाचलुचपत प्रतिबंधक विभाग, पुणे येथे नियुक्त आहेत.
ही कारवाई लाचलुचपत प्रतिबंधक विभागाचे पोलीस अधीक्षक शिरीष सरदेशपांडे आणि अपर पोलीस अधीक्षक-1 अजित पाटील यांच्या मार्गदर्शनाखाली करण्यात आली.
कारवाईनंतर विजय खळदकर हे शासकीय कर्मचारी नसून संबंधित कार्यालयात काम करणारे खाजगी व्यक्ती असल्याचे तपासात स्पष्ट झाले. त्यांच्याविरोधात भ्रष्टाचार प्रतिबंधक अधिनियम 1988 मधील कलम 7(अ) अंतर्गत सासवड पोलीस ठाणे, पुणे ग्रामीण येथे गुन्हा दाखल करण्याची प्रक्रिया सुरू आहे.
दरम्यान, नागरिकांनी कोणत्याही शासकीय कामासाठी लाच मागितली जात असल्यास किंवा भ्रष्टाचारासंदर्भात माहिती असल्यास लाचलुचपत प्रतिबंधक विभागाशी संपर्क साधावा, असे आवाहन विभागाकडून करण्यात आले आहे.
