पुणे: ओल्ड मंक रमच्या विक्रीवरील बंदीमुळे महाराष्ट्रातील मद्यप्रेमींमध्ये नाराजी असतानाच या प्रकरणात मोठी घडामोड समोर आली आहे. ओल्ड मंकची निर्मिती करणाऱ्या मोहन मीकीन कंपनीने विक्रीवरील बंदी उठवण्यासाठी मुंबई उच्च न्यायालयात धाव घेतली होती. मात्र, न्यायालयाने कंपनीला सध्या कोणताही अंतरिम दिलासा दिलेला नाही.
ओल्ड मंकच्या काही प्रकारांच्या घटकांबाबत आणि लेबलिंगबाबत अन्न सुरक्षा आणि मानके प्राधिकरणाने (FSSAI) आक्षेप घेतला होता. त्यानंतर महाराष्ट्रात या उत्पादनाच्या विक्रीवर निर्बंध आले. या निर्णयाविरोधात कंपनीने न्यायालयात याचिका दाखल केली.
सुनावणीदरम्यान ओल्ड मंकच्या बाटलीवरील ‘7 Years Old’ या उल्लेखावर न्यायालयाने प्रश्न उपस्थित केले. या उल्लेखामुळे संपूर्ण रम सात वर्षे जुनी असल्याचा ग्राहकांचा गैरसमज होऊ शकतो, अशी शक्यता न्यायालयाने व्यक्त केली. तसेच उत्पादनामध्ये वापरण्यात येणाऱ्या फ्लेव्हर्सचा उल्लेख बाटलीवर अत्यंत लहान अक्षरात असल्याबाबतही न्यायालयाने नाराजी व्यक्त केली.
या प्रकरणात कंपनीने लेबलमध्ये बदल करण्याची तयारी दर्शवली आहे. बाटलीवरील ‘7 years old blended’ हा उल्लेख हटवण्याबरोबरच फ्लेव्हर्सचा उल्लेख स्पष्टपणे करण्याचे आश्वासन कंपनीने दिले आहे.
दरम्यान, कंपनीच्या वतीने वापरण्यात येणारे फ्लेव्हर्स नियमांनुसार मान्य असल्याचा दावा करण्यात आला. तसेच इतर ब्रँडमध्येही अशा प्रकारे फ्लेव्हर्सचा वापर होत असल्याचे कंपनीकडून न्यायालयाच्या निदर्शनास आणून देण्यात आले.
मात्र, न्यायालयाने महाराष्ट्रातील विक्रीबंदीला तूर्तास स्थगिती देण्यास नकार दिला आहे. त्यामुळे ओल्ड मंकची राज्यातील विक्री सध्या बंदच राहणार आहे. कंपनीने लेबलिंगमध्ये आवश्यक बदल केल्यानंतर पुढील सुनावणीत या प्रकरणाचा काय निर्णय होतो, याकडे मद्यविक्रेते आणि ग्राहकांचे लक्ष लागले आहे.
