नवी दिल्ली : भारतीय संघाने न्यूझीलंड दौऱ्याची सुरुवात दणक्यात केली आहे. पाच सामन्यांच्या टी-२० मालिकेतील पहिल्याच सामन्यात भारताने न्यूझीलंडने दिलेल्या २२६ धावांच्या आव्हानाचा यशस्वी पाठलाग करत चार विकेट्सने विजय मिळवला. संजू सॅमसन, कर्णधार श्रेयस अय्यर आणि नमन धीर यांच्या आक्रमक फलंदाजीमुळे भारताने हा सामना जिंकत मालिकेत १-० अशी आघाडी घेतली.
संजू सॅमसनची वादळी खेळी
क्राइस्टचर्च येथे झालेल्या या सामन्यात न्यूझीलंडने प्रथम फलंदाजी करताना २० षटकांत चार विकेट्स गमावून २२५ धावा केल्या. त्यामुळे भारतासमोर विजयासाठी २२६ धावांचे मोठे लक्ष्य होते.
या आव्हानाचा पाठलाग करताना अभिषेक शर्मा आणि संजू सॅमसन यांनी भारताला आक्रमक सुरुवात करून दिली. दोघांनी पहिल्या विकेटसाठी अवघ्या ५.५ षटकांत ९३ धावांची भागीदारी केली. अभिषेकने १२ चेंडूंमध्ये २९ धावा केल्या, तर संजू सॅमसनने ३३ चेंडूंमध्ये आठ चौकार आणि चार षटकारांच्या मदतीने ६७ धावांची तुफानी खेळी साकारली.
लागोपाठ विकेट्स पडल्याने वाढली धाकधूक
सलामीवीर बाद झाल्यानंतर तिलक वर्मा सहा धावांवर, तर इशान किशन एका धावेवर माघारी परतला. त्यामुळे भारतीय संघ अडचणीत आला. मात्र, कर्णधार श्रेयस अय्यरने २८ चेंडूंमध्ये ४२ धावा करत डावाला आकार दिला. अक्षर पटेलनेही १४ चेंडूंमध्ये २४ धावांचे योगदान दिले.
नमन धीर ठरला विजयाचा शिल्पकार
भारताच्या विजयात नमन धीरची खेळी निर्णायक ठरली. संघाला धावांची गरज असताना त्याने आक्रमक फलंदाजी करत न्यूझीलंडच्या गोलंदाजांवर दबाव आणला. नमनने अवघ्या १५ चेंडूंमध्ये पाच चौकार आणि दोन षटकारांच्या मदतीने नाबाद ४२ धावा केल्या.
त्याच्या फटकेबाजीमुळे भारताने दोन चेंडू राखून लक्ष्य गाठले आणि चार विकेट्सने ऐतिहासिक विजय मिळवला. या विजयासह भारताने पाच सामन्यांच्या मालिकेत १-० अशी आघाडी घेतली. मोठ्या धावसंख्येचा यशस्वी पाठलाग केल्याने भारतीय संघाचा आत्मविश्वासही वाढला आहे.
