यवत, ता. 22 : पिलाणवाडी (ता. दौंड) परिसरात अज्ञात चोरट्यांनी विद्युत रोहित्र फोडून त्यातील तांब्याच्या तारा चोरून नेल्याची घटना उघडकीस आली आहे. या प्रकारात 60 किलो तांब्याच्या तारा आणि 185 लिटर ऑईलचे नुकसान झाले असून, एकूण 81 हजार 750 रुपयांचा मुद्देमाल चोरीला गेल्याची तक्रार यवत पोलीस ठाण्यात दाखल करण्यात आली आहे.
राम भरत फड (वय 28, रा. राहू, ता. दौंड) यांनी याप्रकरणी फिर्याद दिली आहे. फड हेवायरमन म्हणून काम करतात. फिर्यादीनुसार, 14 ऑक्टोबर रोजी सकाळी साडेअकराच्या सुमारास पिलाणवाडी येथील शेतकरी विकास बाळू डुबे यांनी कानडी परिसरातील विद्युत रोहित्र जमिनीवर पडल्याची माहिती त्यांना दिली.
त्यानंतर फड यांनी घटनास्थळी जाऊन पाहणी केली असता, 22/63 केव्हीए क्षमतेचे रोहित्र जमिनीवर पडलेले आढळले. त्याचे वरील झाकण बाजूला पडले होते, तर आतील ऑईल जमिनीवर सांडले होते. रोहित्रातील अंदाजे 60 किलो तांब्याच्या तारा चोरीला गेल्याचेही निदर्शनास आले.
याबाबत वरिष्ठांना माहिती दिल्यानंतर घटनास्थळाची पाहणी करण्यात आली. अज्ञात चोरट्यांनी रोहित्राचे नुकसान करून तांब्याच्या तारा चोरून नेल्याचा संशय व्यक्त करण्यात आला आहे. चोरीला गेलेल्या तांब्याच्या तारांची किंमत 54 हजार रुपये, तर सांडलेल्या ऑईलचे नुकसान 27 हजार 750 रुपये असल्याचे तक्रारीत नमूद आहे. याप्रकरणी यवत पोलीस ठाण्यात गुन्हा दाखल करण्यात आला असून, सहायक फौजदार कदम पुढील तपास करीत आहेत.
