दौंड: दौंड तालुक्यातील खडकी गावात मंगळवारी एसटी बस चालक आणि स्थानिकांमध्ये हाणामारी झाल्याची घटना घडली आहे. एसटी स्टँडवर बस चालकाने बस थांबवण्यास नकार दिल्याने हा संपूर्ण प्रकार घडला आहे. बस चालक ज्ञानोबा मुजाजी वाघमारे यांनी दाखल केलेल्या एफआयआरनुसार, प्रवीण काळे यांच्यासह स्थानिकांनी बस थांबवली आणि चालक आणि वाहकाला मारहाण केली. यामुळे परिस्थिती आणखी बिकट झाली आणि चालक, वाहक आणि स्थानिकांमध्ये तुंबळ हाणामारी झाली. अहमदपूर-परळ या एसटी बसला दगड मारला. या प्रकरणी पोलिसांनी सात जणांविरुद्ध गुन्हा दाखल केला आहे आणि सध्या या प्रकरणाचा तपास सुरू आहे. आरोपींना अटक करण्यासाठी पोलिस आरोपींचा शोध घेत आहे.
पुणेच्या दिशेने जाणाऱ्या अहमदपूर-परळ या एसटी बसला स्थानिकांनी दगड मारला. या घटनेनंतर एसटी चालक, वाहक आणि इतर सहा स्थानिकांमध्ये बाचाबाची झाली. ही घटना खडकी गावच्या हद्दीत सोलापुर पुणे हायवे रोडवर बस स्टॉपजवळ घडली होती.
खडकी गावातील बस स्टॉपला गाडी का थांबवत नाही असे म्हणत या आरोपींनी फिर्यादी व एस.टी. वाहक गोविंद चंद्रपालसिंह गहेरवाल यांनाही जबर मारहाण केली. स्थानिकांनी एस.टी बसचे नुकसान केले आहे. या प्रकरणी अधिक तपास दौंडचे सहाय्यक पोलीस फौजदार मलगुडे करीत आहेत.
